کل جماعتی حریت کانفرنس کے زیر اہتمام اسلام آباد پریس کلب کے باہر احتجاجی مظاہرہ

جمعہ 31 جولائی 2026 13:05

اسلام آباد (اُردو پوائنٹ اخبارتازہ ترین - اے پی پی۔ 31 جولائی2026ء) کل جماعتی حریت کانفرنس نے غلام محمد صفی کی قیادت میں مقبوضہ کشمیر میں ساڑھے تین ہزار سے زائد نوجوانوں کی گرفتاری کےخلاف اسلام آباد میں احتجاجی مظاہرہ کیاجس میں مقبوضہ کشمیر میں جاری بھارتی مظالم کی مذمت کی گئی۔احتجاجی مظاہرے سے کل جماعتی حریت کانفرنس کے قائدین نے خطاب کرتے ہوئے کہا کہ بھارت نے 15 دن میں بے تحاشہ گرفتاریاں کیں،مقبوضہ کشمیر میں خواتین کیساتھ بے حرمتی کی جارہی ہے۔

کل جماعتی حریت کانفرنس کے کنوینئر غلام محمد صفی نے احتجاجی مظاہرے سے خطاب کرتے ہوئے کہا کہ مقبوضہ کشمیر میں بیک وقت ساڑھے تین ہزار سے زائد کشمیریوں کو گرفتار کیا گیا،لوگوں کا پتہ نہیں وہ کہاں ہیں،مقبوضہ کشمیر کے عوام ظلم و ستم کی چکی میں پس رہے ہیں۔

(جاری ہے)

انہوں نے کہا کہ مقبوضہ کشمیر کے حالات پر دنیا خاموش تماشائی بنی ہوئی ہے،جن لوگوں نے رائے شماری میں حصہ لینا تھا انہیں گن گن کر شہید کیا جارہاہے،قتل و غارت کے ذریعے کشمیریوں کے مسئلے کو دبایا نہیں جا سکتا۔

انہوں نے کہا کہ آج تک لاکھوں کشمیری شہید کئے جاچکے ہیں،بھارت نے کشمیری عوام کو ہجرت کرنے پر مجبور کیا ،میڈیا اپنی ذمہ داریوں کا احساس کرتے ہوئے دنیا تک ہمارا پیغام پہنچائے۔انہوں نے کہا کہ آزاد کشمیر کا خطہ کسی بدامنی کا متحمل نہیں ہو سکتا۔حکومت پاکستان اور آزاد کشمیر کا فرض ہے آزاد خطے کا مسئلہ پرامن طریقے سے حل کیا جائے۔آزاد کشمیر کا مسئلہ حل کیا جائے تاکہ حریت کانفرنس بہتر انداز سے اپنا کام کرسکے۔

شمیم شال نے کہا کہ مقبوضہ کشمیر میں اس وقت نفرت کی فضا قائم ہوچکی ہے،کشمیری عوام بھارتی ہتھکنڈوں کے آگے آج تک نہیں جھکے،مقبوضہ کشمیر کے حالات پر بین الاقوامی میڈیا خاموش ہے دوسرے مسائل پر الجھا ہوا ہے۔شمیم شال نے کہا کہ بھارت کے خلاف اب نوجوان نسل اٹھ کھڑی ہوگی،مسئلہ کشمیر کو اجاگر کرنے کیلئے میڈیا کی ذمہ داری پہلے سے زیادہ بڑھ گئی ہے،جو سزا کشمیری عوام کو ملی ہے وہ اس کے مستحق نہیں تھے۔