فٹ پاتھ بھی تجاوزات کی زد میں آ گئے،پیدل چلنے والوں کو مشکلات کا سامنا

بلدیاتی ادارے، ضلعی انتظامیہ اور دیگر متعلقہ حکام تجاوزات کے خلاف مستقل اور بلاامتیاز کارروائی کریں، فٹ پاتھوں کو اصل مقصد کے لیے بحال کریں،شہری

اتوار 2 اگست 2026 16:25

کراچی(اُردو پوائنٹ اخبارتازہ ترین - این این آئی۔ 02 اگست2026ء) شہر قائد میں پیدل چلنے والوں کے لیے تعمیر کیے گئے فٹ پاتھ مختلف علاقوں میں تجاوزات کی زد میں آ گئے ہیں، جس کے باعث شہریوں کو سڑک پر چلنے پر مجبور ہونا پڑ رہا ہے اور حادثات کے خطرات میں بھی اضافہ ہو رہا ہے۔شہریوں کے مطابق فٹ پاتھ، جو محفوظ آمدورفت اور منظم شہری منصوبہ بندی کا اہم حصہ سمجھے جاتے ہیں، اب متعدد مقامات پر دکانداروں، ریڑھی بانوں اور غیر قانونی پارکنگ کی نذر ہو چکے ہیں۔

مختلف علاقوں میں دکانوں کا سامان فٹ پاتھوں تک پھیلا ہوا ہے، جبکہ کئی مقامات پر ریڑھیوں، ہوٹلوں کی کرسیاں، چولہے، موٹر سائیکلیں اور گاڑیاں فٹ پاتھوں پر کھڑی ہونے کے باعث پیدل چلنے والوں کے لیے گزرنا دشوار ہو گیا ہے۔

(جاری ہے)

شہریوں کے مطابق خواتین، بزرگ افراد، بچوں اور خصوصی افراد کو سب سے زیادہ مشکلات کا سامنا کرنا پڑتا ہے، کیونکہ انہیں فٹ پاتھ نہ ہونے کی وجہ سے ٹریفک کے درمیان سڑک پر چلنا پڑتا ہے، جس سے حادثات کا خدشہ بڑھ جاتا ہے۔

شہریوں نے مطالبہ کیا ہے کہ بلدیاتی ادارے، ضلعی انتظامیہ اور دیگر متعلقہ حکام تجاوزات کے خلاف مستقل اور بلاامتیاز کارروائی کریں، فٹ پاتھوں کو اصل مقصد کے لیے بحال کریں اور ایسے اقدامات یقینی بنائیں جن سے پیدل چلنے والوں کو محفوظ اور آسان راستہ میسر آ سکے۔شہری حلقوں نے کہا کہ فٹ پاتھوں کی بحالی نہ صرف شہری سہولت بلکہ ٹریفک کے بہتر نظام، محفوظ آمدورفت اور مہذب شہری ماحول کے قیام کے لیے بھی ناگزیر ہے۔