تاریخ مسخ نہیں کرنی چاہیے، بچوں کو سچ بتانا ہوگا، سعید غنی

غلط کو غلط اور درست کو درست قرار دینے کا فیصلہ ہی کامیاب پاکستان کی بنیاد بن سکتا ہے، صوبائی وزیر

جمعرات 13 اگست 2026 16:07

تاریخ مسخ نہیں کرنی چاہیے، بچوں کو سچ بتانا ہوگا، سعید غنی

کراچی (اُردو پوائنٹ اخبارتازہ ترین - این این آئی۔ 13 اگست2026ء) وزیر محنت و افرادی قوت و سماجی تحفظ سندھ سعید غنی نے کہا ہے کہ ہمیں اپنی تاریخ کو کسی صورت مسخ نہیں کرنا چاہیے اور ملک کے قیام سمیت اس کے بعد پیش آنے والے تمام حقائق بچوں کو سچ بتانے چاہئیں تاکہ انہیں سچ سننے کی عادت ہو۔انہوں نے ان خیالات کا اظہار تکریم اساتذہ فاؤنڈیشن کے تحت ڈی ای او آفس ڈسٹرکٹ ایسٹ میں منعقدہ یوم آزادی پاکستان کی تقریب سے بحیثیت مہمان خصوصی خطاب کرتے ہوئے کیا۔

تقریب میں ڈی او پرائمری اینڈ سیکنڈری، ڈسٹرکٹ ایسٹ کے تعلقہ ایجوکیشن افسران، مختلف اسکولوں کے طلبہ و طالبات، اساتذہ، پرنسپلز اور دیگر افراد نے شرکت کی۔اس موقع پر اسکولوں کے طلبہ و طالبات نے یوم آزادی کی مناسبت سے ٹیبلوز اور قومی نغموں پر شاندار پرفارمنس پیش کی۔

(جاری ہے)

سعید غنی نے کہا کہ یہ اچھی روایت ہے کہ پوری قوم جشن آزادی شایان شان طریقے سے مناتی ہے اور اسکولوں کے طلبہ و طالبات میں جو جذبہ نظر آرہا ہے وہ قابلِ ستائش ہے۔

انہوں نے کہا کہ بدقسمتی سے ماضی میں اسکولوں میں پاکستان کے قیام اور اس کے بعد کے حالات کے بارے میں جو کچھ پڑھایا جاتا رہا، وہ مکمل حقائق پر مبنی نہیں تھا۔ بچوں کی کم عمری میں ان کے ذہنوں میں جو باتیں ڈال دی جائیں وہ طویل عرصے تک ان کے ذہنوں میں رہتی ہیں، اس لیے ضروری ہے کہ انہیں ملک کی تاریخ کے تمام حقائق سے آگاہ کیا جائے۔صوبائی وزیر نے کہا کہ پاکستان بننے کے وقت ملک کے حالات اچھے نہیں تھے اور قیام پاکستان کے بعد کئی سال تک ملک کو جس طرح چلایا گیا، اس کی حقیقت بھی بچوں کو بتانی چاہیے۔

تاریخ سچ ہوگی تو ہم اس سے سبق سیکھ سکیں گے۔انہوں نے کہا کہ پاکستان کے بارے میں منفی کردار دکھایا گیا، حالانکہ بعض معاملات میں مثبت کردار کو مسخ کرکے پیش کیا گیا۔ ہمیں بچوں کو سچ بتانا ہوگا تاکہ وہ سچ سننے اور سمجھنے کی عادت اپنائیں۔سعید غنی کا کہنا تھا کہ ماضی میں ملک میں جو کچھ ہوا اس کے باوجود آج پاکستان دنیا کے کئی ممالک سے بہتر مقام پر ہے۔ اگر ہم اپنے آپ کو درست کرلیں تو ملک خود بخود درست سمت میں گامزن ہوجائے گا۔انہوں نے کہا کہ ہمیں اپنی سوچ درست کرنے کی ضرورت ہے، جس دن ہم نے یہ طے کرلیا کہ غلط کو غلط اور درست کو درست قرار دینا ہے، اسی دن ہمارے بہت سے مسائل حل ہونے کی بنیاد پڑ جائے گی۔