ڈسٹرکٹ ویسٹ پولیس کی کارروائی، اسمگلنگ میں ملوث دو پولیس اہلکار گرفتار

سرقہ شدہ موٹرسائیکل پر ممنوعہ گٹکا اور سگریٹ اسمگل کرنے کی کوشش، مقدمہ درج، مزید تفتیش جاری، ایس ایس پی ویسٹ

اتوار 2 اگست 2026 21:56

کراچی(اُردو پوائنٹ اخبارتازہ ترین - این این آئی۔ 02 اگست2026ء) ڈسٹرکٹ ویسٹ پولیس نے کارروائی کرتے ہوئے ممنوعہ گٹکا اور سگریٹ کی اسمگلنگ میں ملوث دو پولیس اہلکاروں کو گرفتار کر لیا۔ ایس ایس پی ویسٹ طارق الٰہی مستوئی کے مطابق کارروائی سرجانی ٹاؤن پولیس نے نادرن بائی پاس زیرو پوائنٹ کے قریب کی۔ایس ایس پی ویسٹ نے بتایا کہ گرفتار ملزمان سرقہ شدہ موٹرسائیکل پر ممنوعہ گٹکا اور سگریٹ اسمگل کرنے کی کوشش کر رہے تھے۔

پولیس نے ملزمان کے قبضے سے 14 پیکٹ ممنوعہ گٹکا (آداب اور صفینہ برانڈ)، 100 پڑیاں گٹکا ماوا اور چار ڈنڈے سگریٹ برآمد کر لیے۔پولیس کے مطابق گرفتار ملزمان کی شناخت محمد طارق ولد محمد بوٹا، جو ہیڈ کانسٹیبل ہے، اور محمد حسنین ولد محمد اسلم، جو کانسٹیبل ہے، کے نام سے ہوئی ہے۔

(جاری ہے)

ایس ایس پی ویسٹ نے بتایا کہ ملزمان کے زیر استعمال موٹرسائیکل بھی تھانہ جمشید کوارٹرز کی حدود سے سرقہ شدہ نکلی۔

دونوں ملزمان کے خلاف مقدمہ درج کر کے مزید تفتیش شروع کر دی گئی ہے تاکہ اسمگلنگ کے ممکنہ نیٹ ورک اور دیگر سہولت کاروں کا بھی سراغ لگایا جا سکے۔طارق الٰہی مستوئی نے کہاکہ ممنوعہ گٹکا، ماوا اور سگریٹ کی اسمگلنگ سمیت دیگر غیر قانونی سرگرمیوں میں ملوث پولیس اہلکاروں کے خلاف سخت کارروائی کے لیے انسپکٹر جنرل پولیس سندھ کے واضح احکامات موجود ہیں، جن پر بلاامتیاز عمل درآمد جاری ہے۔