5 اگست کا دن کشمیری عوام کی جدوجہد، قربانیوں حقِ خودارادیت کے مطالبے کی یاد تازہ کرتا ہے، ڈاکٹر فردوس عاشق اعوان

بدھ 5 اگست 2026 17:09

سیالکوٹ (اُردو پوائنٹ اخبارتازہ ترین - اے پی پی۔ 05 اگست2026ء) 5 اگست کا دن کشمیری عوام کی جدوجہد، قربانیوں حقِ خودارادیت کے مطالبے کی یاد تازہ کرتا ہے۔ جموں و کشمیر کے عوام گزشتہ کئی دہائیوں سے اپنے بنیادی انسانی حقوق کے حصول کے لیے مسلسل جدوجہد کر رہے ہیں انکی آواز عالمی سطح پر مؤثر انداز میں اجاگر کرنے کی ضرورت ہے۔ان خیالات کا اظہار یومِ استحصالِ کشمیر کے موقع پر سابق وفاقی وزیر ڈاکٹر فردوس عاشق اعوان نے ایک مقامی تعلیمی ادارے میں منعقدہ تقریب سے خطاب کرتے ہوئے کیا ۔

اپنے خطاب میں انہوں نے مزید کہا کہ پاکستان کشمیری عوام کی سیاسی، سفارتی اخلاقی حمایت جاری رکھے ہوئے ہے اور مسئلہ کشمیر کا پائیدار حل اقوام متحدہ کی متعلقہ قراردادوں، کشمیری عوام کی خواہشات کے مطابق ہونا چاہیے۔

(جاری ہے)

انہوں نے کہا کہ نوجوان نسل کو مسئلہ کشمیر کی تاریخ، حقائق اور اس کی آئینی و قانونی حیثیت سے آگاہ کرنا وقت کی اہم ضرورت ہے تاکہ وہ قومی معاملات کے بارے میں بہتر شعور حاصل کر سکیں۔

اس موقع پر سابق وفاقی وزیر نے کہا کہ تعلیمی ادارے صرف درس و تدریس کے مراکز نہیں بلکہ قومی شعور، ذمہ داری اور حب الوطنی فروغ دینے کے بہترین پلیٹ فارم بھی ہیں۔ انہوں نے طلبہ پر زور دیا کہ وہ اپنی تعلیم پر بھرپور توجہ دیں، تحقیق کو فروغ دیں ،پاکستان کی ترقی و خوشحالی میں فعال کردار ادا کریں۔ ان کا کہنا تھا کہ مضبوط، تعلیم یافتہ باصلاحیت نوجوان ہی ملک کا حقیقی سرمایہ ہیں ، یہی نسل مستقبل میں پاکستان مزید مستحکم ترقی یافتہ بنانے میں اہم کردار ادا کرے گی۔

تقریب میں اساتذہ، طلبہ، سماجی شخصیات اور شہریوں کی بڑی تعداد نے شرکت کی۔ شرکاء نے کشمیری عوام کے ساتھ اظہارِ یکجہتی کرتے ہوئے ان کے حقِ خودارادیت کی حمایت کا اعادہ کیا۔ اس موقع پر جموں و کشمیر کے عوام کے لیے خصوصی دعا کی گئی اور پاکستان کی سلامتی، استحکام اور خوشحالی کے لیے بھی دعا مانگی گئی۔ شرکاء نے اس عزم کا اظہار کیا کہ کشمیری عوام کے ساتھ یکجہتی کا یہ جذبہ ہر سطح پر برقرار رکھا جائے گا، مسئلہ کشمیر پرامن منصفانہ انداز میں اجاگر کرنے کی کوششیں جاری رہیں گی۔