پارلیمانی سیکرٹری برائے قومی ورثہ و ثقافت فرح ناز اکبر کی مزارِ قائد پر حاضری، فاتحہ خوانی اور کیک کاٹنے کی تقریب

کراچی (اُردو پوائنٹ اخبارتازہ ترین - این این آئی۔ 13 اگست2026ء) ممبر قومی اسمبلی و پارلیمانی سیکرٹری برائے قومی ورثہ و ثقافت محترمہ فرح ناز اکبر نے کراچی میں مزارِ قائد پر حاضری دی، بانی پاکستان قائداعظم محمد علی جناح کے مزار پر پھولوں کی چادر چڑھائی اور فاتحہ خوانی کی۔ اس موقع پر قائداعظم محمد علی جناح کے درجاتِ بلندی اور مغفرت، ملک و قوم کی سلامتی، ترقی، خوشحالی، استحکام اور پاکستان کے وقار و سربلندی کے لیے خصوصی دعا کی گئی۔

محترمہ فرح ناز اکبر کے ہمراہ پاکستان مسلم لیگ (ن) کے کارکنان اور عہدیداران کی بڑی تعداد بھی موجود تھی۔ کارکنان نے قائداعظم محمد علی جناح کو خراجِ عقیدت پیش کیا اور پاکستان سے اپنی والہانہ محبت اور وابستگی کا اظہار کیا۔مزارِ قائد پر اس موقع پر کیک بھی کاٹا گیا۔

(جاری ہے)

کیک کاٹنے کی تقریب میں پاکستان کی ترقی، خوشحالی، قومی یکجہتی، سلامتی اور عالمی سطح پر پاکستان کے وقار و مقام میں مزید اضافے کے لیے نیک خواہشات کا اظہار کیا گیا۔

اس موقع پر اپنے تاثرات قلم بند کرتے ہوئے محترمہ فرح ناز اکبر نے کہا کہ قائداعظم محمد علی جناح پاکستان کے بانی اور برصغیر کے مسلمانوں کے عظیم رہنما ہیں۔ ان کی انتھک جدوجہد، اصول پسندی، بصیرت اور بے مثال قیادت کے نتیجے میں ہمیں ایک آزاد وطن نصیب ہوا۔ قائداعظم نے مسلمانوں کو ایک واضح سمت، قومی تشخص اور آزاد ریاست کا تصور دیا، جس کی حفاظت اور ترقی ہم سب کی مشترکہ ذمہ داری ہے۔

انہوں نے کہا کہ قائداعظم کا فرمان "اتحاد، ایمان اور تنظیم" آج بھی پوری قوم کے لیے رہنمائی کا روشن اصول ہے۔ پاکستان کو مضبوط اور خوشحال بنانے کے لیے ہمیں باہمی اتحاد، نظم و ضبط، محنت اور قومی ذمہ داری کے جذبے کو فروغ دینا ہوگا۔ارلیمانی سیکرٹری نے کہا کہ مزارِ قائد ہماری قومی تاریخ، آزادی کی جدوجہد اور قائداعظم کے عظیم کردار کی زندہ علامت ہے۔

قومی ورثہ و ثقافت کے تحفظ اور تاریخی مقامات کی نگہداشت کے ساتھ ساتھ نئی نسل کو اپنے قومی ہیروز، تاریخ اور ثقافتی ورثے سے روشناس کرانا حکومت کی اہم ترجیحات میں شامل ہے۔محترمہ فرح ناز اکبر نے مزید کہا کہ آج ہمیں عہد کرنا ہوگا کہ ہم قائداعظم کے اصولوں پر عمل کرتے ہوئے پاکستان کی ترقی، استحکام، خوشحالی اور عالمی سطح پر اس کے وقار میں اضافے کے لیے اپنا بھرپور کردار ادا کریں گے۔

پاکستان کی سلامتی، خودمختاری اور قومی وقار پر کوئی سمجھوتہ نہیں کیا جائے گا۔انہوں نے کہا کہ مسلم لیگ (ن) کے کارکنان قائداعظم محمد علی جناح? کے نظریات اور پاکستان کی ترقی کے مشن کے ساتھ اپنی وابستگی کو مزید مضبوط بنائیں اور ملک کی تعمیر و ترقی میں مثبت اور مؤثر کردار ادا کریں۔تقریب کے اختتام پر قائداعظم محمد علی جناح کے درجاتِ بلندی اور مغفرت، پاکستان کی سلامتی و استحکام، افواجِ پاکستان کی کامیابی، ملکی ترقی و خوشحالی اور پاکستان کے قومی وقار و سربلندی کے لیے خصوصی دعا کی گئی۔