تعمیرپاکستان سے استحکامِ پاکستان تک علماء کرام اور مدراس کا کردا ر بڑی اہمیت کا حامل ہے ، مفتی محمد یوسف کشمیری

کراچی(اُردو پوائنٹ اخبارتازہ ترین - این این آئی۔ 15 اگست2026ء) 14اگست کی مناسبت سے محمد یوسف کشمیری صدر مجلس و مدیر جامعہ الدرسات الاسلامیہ کراچی و رکن قومی امن کمیٹی نے کانفرنس کے شرکاء سے خطاب کرتے ہوئے کہا کہ ہم حرم کی پاسبانی کے لیے ایک ہیں اور تادم زیست ایک رہیں گے ۔ انہوں نے کہا کہ علامہ اقبال اور مسلمانانِ ہند کا یہ خواب تھا کہ ساری دنیا کے مسلمان اور خاص طور پر برصغیر کے مسلمان ایک ہو کر حرمین شریفین کی پاسبانی کریں جسے اللہ رب العزت نے آج ہمارے لیے شرمندہ تعبیر کر دیا ہے ۔

مکہ دفاعی معاہدہ اس بات کی غمازی کرتا ہے کہ سعودی عربیہ ، پاکستان اور ترکی کے سربراہان مملکت نے ایک ہو کر جو تاریخی معاہدہ کیا ہے وہ واقعی ہی تاریخی ہے اس لیے کہ خادم الحرمین الشریفین شاہ محمد بن سلمان جو سعودی حکمران ہیں لیکن اللہ تعالیٰ نے اب پاک فوج اور پاکستان کی عوام کو بھی حرم کی پاسبانی کرنے کا شرف بخشا ہے ۔

(جاری ہے)

انہوں نے مزید گفتگو کرتے ہوئے کہا کہ ملکی استحکام ، اتحاد ، نظم و ضبط ، اسلامی اور عصری تعلیم ، اخلاقی تربیت اور خاص کر قانون کی پاسداری ہم سب کی قومی ذمہ داری ہے جس کو نبھانا اور فروغ دینا ہم سب کا مذہبی اور ملی فریضہ ہے ۔

علامہ محمد یوسف کشمیری نے نوجوان نسل کو اپنا تعلیمی پیغام دیتے ہوئے کہا کہ پاکستان کی نسلِ نو پاکستان کے روشن مستقبل کی ضامن ہے ۔ ہمیں چاہیے کہ ہم اپنے ملک کے لیے اپنی صلاحیتوں کو بروئے کار لا کر ملک میں مزید ترقی کے اسباب پیدا کریں ۔ تعمیر پاکستان سے استحکا مِ پاکستان تک علماء اور مدرا س کا کردار کے عنوان سے گفتگو کرتے ہوئے مفتی صدیق الرحمن نے کہا کہ پاکستان ہمارا وطن ہی نہیں بلکہ ہمارا گھر ہے ہمیں اس سے ہر قسم کے حالات میں محبت کرنی ہوگی اور محبت کرنا گناہ نہیں لیکن اس کے برعکس ملک میں تعصب ، لسانیت کو فروغ دینا یہ ہمارا شیوہ نہیں ہونا چاہیے۔

انہوں نے کہا کہ نبی کریمﷺاور صحابہ اکرام ؓ جب مکہ سے ہجرت کر کے مدینہ آئے تو حضرت بلا ل ؓؓ اور سیدنا ابو بکر صدیق ؓ مکہ کو یاد کر کے اشعار پڑھا کرتے تھے ۔ کانفرنس کے تیسرے مقرر ڈاکٹر رضوان سلیم نے کہا کہ آزادی نعمت خداوندی ہے اس آزادی کی ہر طرح سے حفاظت کرنا ہمارا فرض عین ہے ۔ انہوں نے کہا کہ پاکستان بنتے وقت جن علمائے اہلحدیث اور ہمارے بانیان اہلحدیث نے کردار ادا کیا تھا اُن کی قربانیاں ہمیں ہمیشہ یاد رہیں گی کیونکہ پاکستان کے قیام اور استحکام میں دینی مدراس کا کردار کسی سے مخفی نہیں ۔

اس پروگرام میںشریک تمام سامعین کرام اور علماء و مشائخ نے ملک و قوم کی ترقی اور خوشحالی کے لیے دعائیں کیں اور اس کانفرنس میں مفتی مزمل ابرار، مفتی عبد الغفار چانڈیو، مفتی محمد اصغر، مفتی محمد اکرام و دیگر علمائے کرام و مشائخ نے بھی شرکت کی۔