Live Updates

جنگ کے دوران امریکا نے مذاکرات کی درخواست کی: ایرانی وزیر خارجہ

بدھ 19 اگست 2026 18:25

ژ* تہران(اُردو پوائنٹ اخبارتازہ ترین - آن لائن۔ 19 اگست2026ء) ایرانی وزیر خارجہ عباس عراقچی نے کہا ہے کہ جنگ کے دوران امریکا نے مذاکرات کی درخواست کی، صدر مسعود پزشکیان نے امریکی درخواستوں کو سنجیدگی سے لینے کا کہا۔اپنے بیان میں ایران کے وزیر خارجہ عباس عراقچی کا کہنا ہے کہ صدر نے مذاکرات کے ذریعے جنگ کو خاتمے کی جانب لے جانے پر زور دیا، مسعود پزشکیان کی تجویز پر باقر قالیباف کو مذاکراتی ٹیم کی قیادت کے لئے منتخب کیا گیا۔

انہوں نے کہا کہ ایران نے ثالثوں کو بتایا کہ عارضی نہیں بلکہ مستقل جنگ بندی چاہتے ہیں، دشمن ایران کو سرنڈر کرانے، رجیم چینج کرنے میں ناکام رہا، ملک کو تقسیم کرنے اور اندرونی بدامنی پیدا کرنے کے منصوبے بھی ناکام ہوئے، دشمن نے جو بھی منصوبہ آزمایا اسے ناکامی اور شکست کا سامنا کرنا پڑا۔

(جاری ہے)

عباس عراقچی کا کہنا تھا کہ صدر پزشکیان نے کردی زبان میں گفتگو کی جس سے عراقی کردستانی عوام بھی ایران سے جڑ گئے، 40 روزہ جنگ کے دوران ایران اور آذربائیجان کے تعلقات میں بھی کشیدگی پیدا ہوئی تھی۔

ایرانی وزیر خارجہ نے کہا کہ صدر پزشکیان نے آذربائیجان کے صدر الہام علییف سے ٹیلیفون پر گفتگو کی، چند آذری کہاوتوں کے استعمال سے تعلقات میں پیدا ہونے والی تلخی ختم ہوگئی، صدر پزشکیان کی سفارتی کوششوں نے مشکل حالات میں اہم کردار ادا کیا۔