Live Updates

برطانیہ میں بجلی کے بلوں سے شہری پریشان؛ مہنگائی 2.9 فیصد تک پہنچ گئی

گزشتہ ماہ گھریلو توانائی کے نرخوں کی حد میں 13 فیصد اضافہ نافذ کیا گیا ،برطانوی میڈیا

جمعرات 20 اگست 2026 10:35

لندن(اُردو پوائنٹ اخبارتازہ ترین - این این آئی۔ 20 اگست2026ء) برطانیہ میں مہنگائی کی سالانہ شرح جولائی میں بڑھ کر 2.9 فیصد ہوگئی جس کی بڑی وجہ گھریلو توانائی کے بلوں میں نمایاں اضافہ ہے۔برطانوی ادارہ برائے قومی شماریات (او این ایس)کے مطابق جون میں صارف قیمتوں کے اشاریے کے تحت مہنگائی 2.6 فیصد تھی جو جولائی میں بڑھ کر 2.9 فیصد ہوگئی۔رپورٹ میں کہا گیا ہے کہ گزشتہ ماہ گھریلو توانائی کے نرخوں کی حد میں 13 فیصد اضافہ نافذ کیا گیا جس کے باعث گیس اور بجلی کے اخراجات میں نمایاں اضافہ ہوا۔

او این ایس نے گیس کی قیمتوں میں اس اضافے کو تقریبا چار سال کے دوران سب سے بڑا اضافہ قرار دیا ہے۔برطانوی حکام کا کہنا تھا کہ مشرقِ وسطی میں جاری جنگ اور توانائی کی عالمی قیمتوں میں اتار چڑھا کا اثر برطانیہ میں بھی روزمرہ اخراجات پر پڑ رہا ہے۔

(جاری ہے)

حکومت نے بڑھتے ہوئے مہنگائی کے دبا سے نمٹنے کے لیے بجلی کے گھریلو نرخوں میں ٹیکس کمی اور بس کرایوں کی حد مقرر کرنے سمیت مختلف اقدامات کا اعلان کیا ہے۔

برطانوی وزیر خزانہ جان ہیلی نے کہا کہ ایران جنگ کے باعث پیدا ہونے والی مہنگائی کا اثر ملک میں قیمتوں پر پڑ رہا ہے۔تاہم انھوں نے برطانوی معیشت کو مضبوط قرار دیتے ہوئے مزید اقدامات کی ضرورت پر بھی زور دیا۔ماہرین اقتصادیات کا کہنا تھا کہ توانائی کے بلند اخراجات آنے والے مہینوں میں بھی مہنگائی کو مزید بڑھا سکتے ہیں، خصوصا اس صورت میں جب مشرقِ وسطی میں جاری تنازع کے خاتمے کے لیے کوئی واضح پیش رفت سامنے نہ آئے۔