دہشت گردوں کے خلاف بلاامتیاز کارروائیاں جاری رکھنا وقت کی اہم ضرورت ہے،گورنرپختونخوا

جمعرات 27 اگست 2026 20:39

اسلام آباد(اُردو پوائنٹ اخبارتازہ ترین - آن لائن۔ 27 اگست2026ء) گورنر خیبرپختونخوا فیصل کریم کنڈی نے خیبرپختونخوا اور بلوچستان میں فتنہ الخوارج اور فتنہ الہندوستان سے تعلق رکھنے والے دہشت گردوں کے خلاف سیکیورٹی فورسز کی کامیاب کارروائیوں پر خراجِ تحسین پیش کیا ہے۔گورنر خیبرپختونخوا نے کہا کہ جنوبی وزیرستان، بنوں اور خضدار میں سیکیورٹی فورسز کی مؤثر اور بروقت کارروائیاں دہشت گردی کے خلاف فورسز کے بلند عزم، جرات اور پیشہ ورانہ صلاحیتوں کا واضح ثبوت ہیں۔

فیصل کریم کنڈی نے کہا کہ دہشت گردوں کے خلاف بلاامتیاز کارروائیاں جاری رکھنا وقت کی اہم ضرورت ہے، جبکہ فتنہ الخوارج اور فتنہ الہندوستان سمیت تمام دہشت گرد عناصر کا مکمل خاتمہ قومی سلامتی اور پائیدار امن کے لیے ناگزیر ہے۔

(جاری ہے)

انہوں نے کہا کہ دہشت گردی کے خلاف جنگ میں سیکیورٹی فورسز اور قانون نافذ کرنے والے اداروں کی قربانیاں پوری قوم کے لیے باعثِ فخر ہیں اور پوری قوم اپنے بہادر جوانوں اور سیکیورٹی اداروں کے شانہ بشانہ کھڑی ہے۔گورنر خیبرپختونخوا نے کہا کہ پاکستان دشمن عناصر کے مذموم عزائم کبھی کامیاب نہیں ہونے دیے جائیں گے۔ دہشت گردی کے مکمل خاتمے تک جنگ جاری رہے گی اور ملک سے دہشت گردی کا خاتمہ کرکے پائیدار امن کے قیام کو یقینی بنایا جائے گا۔