چیچہ وطنی،ڈویژنل کمشنر نے ڈپٹی کمشنر کے ہمراہ تحصیل ہیڈکوارٹر ہسپتال کا دورہ کرکیطبی و دیگر سہولیات کا تفصیلی جائزہ لیا

جمعہ 28 اگست 2026 14:02

چیچہ وطنی (اُردو پوائنٹ اخبارتازہ ترین - اے پی پی۔ 28 اگست2026ء) کمشنر ساہیوال ڈویژن ڈاکٹر آصف طفیل نے ڈپٹی کمشنر سمیع اللہ فاروق کے ہمراہ تحصیل ہیڈکوارٹر ہسپتال چیچہ وطنی کا دورہ کیا اور ہسپتال میں مریضوں کو فراہم کی جانے والی طبی و دیگر سہولیات کا تفصیلی جائزہ لیا۔ کمشنر ڈاکٹر آصف طفیل نے ہسپتال کے مختلف شعبہ جات کا معائنہ کیا اور زیرِ علاج و آنے والے مریضوں سے طبی سہولیات، ادویات اور عملے کے رویے سمیت دیگر انتظامات کے بارے میں دریافت کیا۔

انہوں نے ہسپتال کی دیواروں پر نصب آگ بجھانے والے آلات اور ایئر کنڈیشنرز بھی چیک کیے۔ کمشنر نے گرمی کے موسم کے پیش نظر ہسپتال کے تمام ایئر کنڈیشنرز کو فعال اور درست حالت میں رکھنے کی ہدایت کرتے ہوئے کہا کہ مریضوں اور ان کے لواحقین کو بہتر ماحول کی فراہمی انتظامیہ کی ذمہ داری ہے۔

(جاری ہے)

انہوں نے ہسپتال میں لٹکتی ہوئی بجلی کی تاروں اور غیر محفوظ الیکٹرک وائرنگ کا فوری تدارک کرنے کی ہدایت کی تاکہ کسی بھی ممکنہ حادثے سے بچا جا سکے۔

انہوں نے ہسپتال میں صفائی ستھرائی کے نظام کو مزید بہتر بنانے اور مریضوں کو صاف ستھرا ماحول فراہم کرنے کے لیے بھی ضروری اقدامات کی ہدایت کی۔ کمشنر ڈاکٹر آصف طفیل نے کہا کہ سرکاری ہسپتالوں میں آنے والے مریضوں کو معیاری طبی سہولیات کی فراہمی، صاف ستھرا ماحول اور محفوظ انتظامات حکومت پنجاب کی ترجیحات میں شامل ہیں۔ ہسپتال انتظامیہ مریضوں کو بہترین سہولیات کی فراہمی یقینی بنانے کے لیے اپنی ذمہ داریاں مؤثر انداز میں ادا کرے۔

بعد ازاں انہوں نے مرتضی شہید پارک میں پنجاب ڈیولپمنٹ پروگرام کے تحت زیر تعمیر انڈر گرانڈ واٹر ٹینک پر جاری ترقیاتی کام کا جائزہ لیا۔ اس موقع پر ڈپٹی کمیشن سمیع اللہ فاروق نے انڈر گرانڈ واٹر ٹینکر کی تعمیر کے حوالے سے تفصیلی بریفنگ دی۔ انہوں نے کہا کہ تعمیراتی کام کو ڈیڈ لائن کے مطابق مکمل کیا جائے اور جاری کام کے دوران حفاظتی اقدامات کا خاص خیال رکھا جائے۔\378