کیرولین لیویٹ ملازمت کے آخری دن بچوں کو وائٹ ہاﺅس کے بریفنگ روم میں لے آئیں

ماں کا کردار نبھانا اور ملازمت کے تقاضے پورے کرنا اب ایک ساتھ ممکن نہیں رہا تھا. وائٹ ہاﺅس کی سبکدوش پریس سیکرٹری کا انٹرویو

میاں محمد ندیم جمعہ 28 اگست 2026 14:06

کیرولین لیویٹ ملازمت کے آخری دن بچوں کو وائٹ ہاﺅس کے بریفنگ روم میں ..

واشنگٹن(اردوپوائنٹ اخبارتازہ ترین-انٹرنیشنل پریس ایجنسی۔28 اگست ۔2026 ) کیرولین لیویٹ بطور وائٹ ہاﺅس پریس سیکرٹری آخری دن اپنے بچوں کو وائٹ ہاﺅس کے بریفنگ روم میں لے آئیں اس موقع پر انہوں نے اپنے دونوں چھوٹے بچوں کے ساتھ تصاویر بنوائیں، وہ اپنے ایک چھوٹے بچے کو کیمروں کی طرف دیکھ کر مسکرانے کا بھی کہتی رہیں . کیرولین لیویٹ کا بطور پریس سیکرٹری وائٹ ہاﺅس جمعرات آخری دن تھا جس کے بعد ان کی تقریباً 20 ماہ کی مدتِ ملازمت ختم ہو گئی آخری دن اپنے انٹرویوز میں انہوں نے کہا کہ ماں کا کردار نبھانا اور ملازمت کے تقاضے پورے کرنا اب ایک ساتھ ممکن نہیں رہا تھا، ملازمت کرنے والی ماں کے لیے ہر دن چیلنج ہوتا ہے، آپ کو قربانیاں دینی پڑتی ہیں.

(جاری ہے)

کیرولین لیویٹ نے کہا کہ 2 انتہائی کم عمر بچوں کی پرورش کے لیے جس طرح گھر میں موجود ہونے کی ضرورت ہوتی ہے کام کی وجہ سے ایسا نہیں کر سکتی تھی انہوں نے کہا کہ میری دوسری بیٹی کی پیدائش نے مجھے درحقیقت یہ احساس دلایا کہ گھر پر 2 ایسے بچے موجود ہیں جنہیں اپنی ماں کی ہر وقت مسلسل توجہ اور موجودگی کی ضرورت ہے اور وہ اس کے حق دار ہیں. کیرولین لیویٹ نے کہا کہ میرے بچے بہت چھوٹے ہیں اور یہ عمر ایسی ہے جس میں بچوں پر بہت گہرا اثر پڑتا ہے اور ظاہر ہے اپنے چھوٹے بچوں کے ساتھ گزرنے والا یہ وقت ہمیں دوبارہ کبھی نہیں ملتا واضح رہے کہ 29 برس کی لیویٹ امریکی تاریخ کی کم عمر ترین پریس سیکرٹری ہیں، ان کے پہلے بیٹے کی عمر 2 سال اور دوسری بیٹی کی عمر 3 ماہ ہے.