ّباغات کاٹنے کی دھمکی بلوچستان کے عوام کے خلاف ناقابلِ قبول حکومتی رویہ ہے ، انیل غوری

ئ*کوئٹہ (اُردو پوائنٹ اخبارتازہ ترین - آن لائن۔ 29 اگست2026ء) نیشنل پارٹی کے صوبائی سیکرٹری برائے انسانی حقوق انیل غوری نے وزیراعلیٰ بلوچستان سرفراز بگٹی کی جانب سے مستونگ میں امن و امان کے نام پر باغات ختم کرنے یا آبادی منتقل کرنے کے بیان پر شدید ردِعمل کا اظہار کرتے ہوئے کہا ہے کہ باغات اور فصلیں کاٹنے کی بات مسئلے کا حل نہیں بلکہ حکومت کی انتظامی اور سیکیورٹی ناکامی کا اعتراف ہے۔

انیل غوری نے کہا کہ مستونگ، قلات اور بلوچستان کے دیگر علاقوں کے باغات صرف درختوں کا مجموعہ نہیں بلکہ ہزاروں خاندانوں کی روزی، کسانوں کی محنت، بلوچستان کی زرعی معیشت اور آنے والی نسلوں کا مستقبل ہیں۔ کسی علاقے میں بدامنی یا حملوں کا جواز بنا کر پورے علاقے کے لوگوں کو نقل مکانی پر مجبور کرنا یا ان کے باغات تباہ کرنے کی بات کرنا انتہائی تشویشناک اور قابلِ مذمت ہے۔

(جاری ہے)

انہوں نے کہا کہ اگر ریاست شہریوں کو تحفظ فراہم کرنے میں ناکام ہو جائے اور پھر اسی ناکامی کا بوجھ عوام، زمینداروں اور کسانوں پر ڈال دے تو یہ حکمرانی نہیں بلکہ اپنی ذمہ داری سے فرار ہے۔ امن و امان قائم کرنا ریاست اور حکومت کی آئینی ذمہ داری ہے، جبکہ اپنی زمینوں اور باغات کی حفاظت کرنا عوام کو ریاستی فرائض کا متبادل نہیں بنایا جا سکتا۔

نیشنل پارٹی کے رہنما نے کہا کہ بلوچستان پہلے ہی پانی کی شدید قلت، خشک سالی، ماحولیاتی تبدیلی اور زرعی بحران کا سامنا کر رہا ہے۔ ایسے حالات میں باغات کو کاٹنے یا تباہ کرنے کی بات کرنا ماحولیاتی اور معاشی دونوں اعتبار سے انتہائی خطرناک سوچ ہے۔ جو درخت اور باغات برسوں کی محنت سے پروان چڑھتے ہیں، انہیں چند لمحوں کے حکومتی حکم سے ختم نہیں کیا جا سکتا۔

انہوں نے مزید کہا کہ حکومت کو چاہیے کہ باغات ختم کرنے کی بات کرنے کے بجائے مستونگ اور قلات میں مؤثر سیکیورٹی، قانون کی بالادستی اور شہریوں کے جان و مال کا تحفظ یقینی بنائے۔ اگر کسی مخصوص مقام سے حملے ہو رہے ہیں تو ذمہ دار عناصر کے خلاف کارروائی کی جائے، مگر پورے علاقے کے زمینداروں، کسانوں اور عام آبادی کو سزا دینا کسی صورت قابلِ قبول نہیں۔

انیل غوری نے واضح کیا کہ نیشنل پارٹی بلوچستان کے عوام کے معاشی، انسانی اور ماحولیاتی حقوق پر کوئی سمجھوتہ نہیں کرے گی۔ باغات کی تباہی، عوام کی جبری نقل مکانی اور حکومتی ناکامی کا بوجھ شہریوں پر ڈالنے کے خلاف نیشنل پارٹی ہر آئینی، قانونی، سیاسی اور جمہوری فورم پر بھرپور آواز بلند کرے گی۔امن چاہیے، باغات کی تباہی نہیں تحفظ چاہیے، عوام کی بے دخلی نہیں حکومت اپنی ذمہ داری نبھائے، عوام کو سزا نہ دے۔