27 ستمبر کو عمران خان کی رہائی کیلئے سب کو اپنا وزن اٹھانا پڑے گا، سہیل آفریدی

ہم عمران خان کی رہائی کیلئے مسلسل جدوجہد کررہے ہیں لیکن ہم ناکام اس لیے ہیں کہ ہمارے لوگ دل سے جدوجہد نہیں کررہے، سب اپنا بوجھ دوسرے پر ڈال رہے ہیں؛ وزیراعلیٰ خیبرپختونخواہ کا تقریب سے خطاب

ساجد علی اتوار 30 اگست 2026 18:50

27 ستمبر کو عمران خان کی رہائی کیلئے سب کو اپنا وزن اٹھانا پڑے گا، سہیل ..

پشاور (اُردو پوائنٹ اخبارتازہ ترین۔ 30 اگست 2026ء) خیبرپختونخواہ کے وزیراعلیٰ سہیل آفریدی نے عمران خان کی رہائی کی تحریک میں اب تک کی ناکامی کا کھلے عام اعتراف کرتے ہوئے 27 ستمبر کو لانگ مارچ اور تمام اہم شاہراہیں بند کرنے کے منصوبے کا اعلان کردیا۔ 27 ستمبر کے لانگ مارچ کی مشاورتی کانفرنس سے خطاب کرتے ہوئے وزیراعلیٰ سہیل آفریدی نے کہا کہ ہم عمران خان کی رہائی کے لیے مسلسل جدوجہد کر رہے ہیں لیکن ہم ناکام اس لیے ہیں کہ ہمارے لوگ دل سے جدوجہد نہیں کر رہے، سب اپنا بوجھ دوسروں پر ڈال رہے ہیں، مصلحت کا شکار ہیں اور پیچھے ہٹ رہے ہیں۔

انہوں نے واضح کیا کہ 27 ستمبر کو ایسا نہیں چلے گا اور تمام اراکین کو اپنا بوجھ خود اٹھانا پڑے گا، اس سلسلے میں جنید اکبر نے علی امین گنڈاپور کے پاس جانے کا فیصلہ کیا ہے، جس کا میں خیرمقدم کرتا ہوں کیوں کہ مل کر ہی کامیابی ممکن ہوگی، اس لیے تمام نمائندے آج سے ہی اپنے اپنے علاقوں میں سٹریٹ موومنٹ کا آغاز کریں گے، اراکین کی کارکردگی اور تحرک پر نظر رکھنے کے لیے ایک خصوصی مانیٹرنگ کمیٹی تشکیل دے دی گئی ہے جو تمام سرگرمیوں کی رپورٹ مرتب کرے گی۔

(جاری ہے)

سہیل آفریدی نے سوشل میڈیا کو پارٹی کی طاقت قرار دیتے ہوئے کہا کہ 27 ستمبر کی تاریخ کے حوالے سے ہونے والے منفی پروپیگنڈے کا عوام نے سڑکوں پر نکل کر جواب دینا ہے، پی ٹی آئی کی جانب سے 27 ستمبر کو نارتھ پنجاب خیبرپختونخواہ کے ساتھ مل کر احتجاج کرے گا، سینٹرل ویسٹ پنجاب کا رخ لاہور کی جانب ہوگا۔ ان کا مزید یہ بھی کہنا تھا کہ ساؤتھ پنجاب کا کے پی سے متصل علاقہ خیبرپختونخواہ کے ساتھ شامل ہوگا اور باقی حصوں میں اہم شاہراہیں بند کی جائیں گی، سندھ بھر کی مرکزی شاہراہیں بند رکھی جائیں گی جبکہ حیدرآباد اور کراچی کے کارکن مل کر کراچی کو مکمل بند کریں گے، بلوچستان کے رہنما اور کارکن کوئٹہ سمیت تمام قومی شاہراہیں بند کر کے احتجاج ریکارڈ کرائیں گے۔