ایس ای سی پی نے چھوٹے کاروباروں کے لیے شریعہ کمپلائنٹ ڈیجیٹل فنانسنگ کی منظوری دے دی

جمعہ 18 ستمبر 2026 13:04

اسلام آباد (اُردو پوائنٹ اخبارتازہ ترین - اے پی پی۔ 18 ستمبر2026ء) سیکیورٹیز اینڈ ایکسچینج کمیشن آف پاکستان (ایس ای سی پی) نے چھوٹے کاروباروں کو 30 لاکھ روپے تک شریعہ کمپلائنٹ فنانسنگ فراہم کرنے والی ڈیجیٹل ایپلی کیشن ’’شامل کار تاجر‘‘ کی منظوری دے دی ہے۔جمعہ کو سکیورٹی ایکسچینج کمیشن آف پاکستان کی جانب سے جاری بیان کے مطابق ایس ای سی پی سے لائسنس یافتہ شامل کار فنانشل سروسز کی تیار کردہ اس ایپ کے ذریعے چھوٹے کاروباری افراد، منظور شدہ سپلائرز سے انوینٹری کی خریداری کے لیے آسان اور تیز ڈیجیٹل طریقہ کار کے تحت فنانسنگ حاصل کر سکیں گے۔

اس اقدام کا مقصد مالی سہولتوں سے محروم کاروباروں کو باضابطہ کریڈٹ نظام میں شامل کرکے ان کے کاروبار کے فروغ میں معاونت کرنا ہے۔

(جاری ہے)

چیئرمین ایس ای سی پی ڈاکٹر کبیر احمد سدھو نے کہا کہ ٹیکنالوجی پر مبنی فنانسنگ سے غیر رسائی والے کاروباروں کے لیے باضابطہ قرضوں تک رسائی بڑھائی جا سکتی ہے۔ انہوں نے کہا کہ ایس ای سی پی مؤثر ریگولیٹری نگرانی اور صارفین کے تحفظ کو یقینی بناتے ہوئے ذمہ دارانہ ڈیجیٹل فنانسنگ کو فروغ دے گا۔

یہ منظوری وفاقی حکومت کے ایس ایم ایز اور دیگر ترجیحی شعبوں کے لیے فنانس تک رسائی کے ایجنڈے کا حصہ ہے۔ جولائی 2025 سے جون 2026 کے دوران لائسنس یافتہ قرض فراہم کرنے والے این بی ایف سیز نے مائیکرو، چھوٹے اور درمیانے درجے کے کاروباروں کو 25 لاکھ قرضوں کے ذریعے تقریباً 253 ارب روپے فراہم کیے۔