فیصل آباد میں پاکستان کا پہلا ٹری ری پلانٹیشن آرچرڈ باغِ جناح میں قائم کیا جا رہا ہے،ڈاکٹر عمران حامد شیخ

اتوار 20 ستمبر 2026 18:32

فیصل آباد (اُردو پوائنٹ اخبارتازہ ترین - اے پی پی۔ 20 ستمبر2026ء) فیصل آباد میں پاکستان کا پہلا ٹری ری پلانٹیشن آرچرڈ باغِ جناح میں قائم کیا جا رہا ہے، جہاں میٹرو بس پراجیکٹ کے روٹس کی زد میں آنے والے درختوں کو محفوظ بنانے کے لیے ری پلانٹیشن کا عمل تیزی سے جاری ہے۔ اسی طرز کا ایک اور باغیچہ کلیم شہید پارک میں بھی بنایا جائے گا۔میٹرو بس پراجیکٹ کے روٹس کی زد میں آنے والے مجموعی طور پر 795 درختوں کی ری پلانٹیشن کی جا رہی ہے، جن میں سے اب تک 242 درخت کامیابی سے ری پلانٹ کیے جا چکے ہیں، جبکہ باقی درختوں کی ری پلانٹیشن کا عمل بھی جاری ہے۔

حکام کے مطابق نومبر 2026ء تک 795 درختوں کی سو فیصد ری پلانٹیشن مکمل کرنے کا ہدف مقرر کیا گیا ہے۔اس سلسلے میں کمشنر فیصل آباد ڈاکٹر عمران حامد شیخ نے باغِ جناح، کلیم شہید پارک اور دھوبی گھاٹ گراؤنڈ کا دورہ کیا اور درختوں کی ری پلانٹنگ کے جاری عمل کا تفصیلی معائنہ کیا۔

(جاری ہے)

اس موقع پر ڈائریکٹر جنرل ہارٹیکلچر ایجنسی دلاور خان چدھڑ نے کمشنر فیصل آباد کو منصوبے اور جاری ری پلانٹیشن سرگرمیوں کے بارے میں بریفنگ دی۔

کمشنر فیصل آباد ڈاکٹر عمران حامد شیخ نے ہارٹیکلچر ایجنسی کے اقدامات کو سراہتے ہوئے ہدایت کی کہ ری پلانٹ کیے جانے والے تمام درختوں کی مناسب دیکھ بھال، آبپاشی اور نگہداشت کو یقینی بنایا جائے تاکہ انہیں کامیابی سے پروان چڑھایا جا سکے۔انہوں نے کہا کہ درخت ہمارا قیمتی اثاثہ ہیں اور انہیں کسی بھی صورت ضائع نہیں ہونے دیا جائے گا۔ ماحولیاتی آلودگی کے خاتمے اور صاف ستھرے ماحول کے لیے زیادہ سے زیادہ درختوں کو محفوظ بنانا اور ان کی افزائش ضروری ہے۔

انہوں نے کہا کہ شہریوں کو بھی شجرکاری میں بھرپور حصہ لیتے ہوئے زیادہ سے زیادہ پودے لگانے اور ان کی مناسب نگہداشت کرنی چاہیے تاکہ شہر کے گرین کور میں اضافہ، سرسبز و شادابی کا فروغ اور ماحولیاتی تحفظ یقینی بنایا جا سکے۔