سیپا کا ماحولیاتی نگرانی و انتظام کا ڈیجیٹل نظام متعارف

ماحولیاتی منظوریوں، این او سیز، صنعتی رجسٹریشن، انسپیکشن اور شکایات کا نظام آن لائن ہوگا، مصنوعی ذہانت پر مبنی چیٹ بوٹ سے شہریوں کو رہنمائی ملے گی،فیصل عقیلی

جمعرات 24 ستمبر 2026 11:44

کراچی(اُردو پوائنٹ اخبارتازہ ترین - این این آئی۔ 24 ستمبر2026ء) سندھ انوائرمنٹل پروٹیکشن ایجنسی (سیپا) نے ٹیکنالوجی نمائش میں ڈیجیٹلائزیشن اور سندھ انٹیگریٹڈ انوائرمنٹل مانیٹرنگ اینڈ مینجمنٹ انفارمیشن سسٹم متعارف کرادیا۔سیکریٹری ماحولیات فیصل احمد عقیلی نے کہا ہے کہ نئے نظام کا مقصد ماحولیاتی گورننس، نگرانی اور عوامی خدمات کو جدید ڈیجیٹل نظام سے منسلک کرنا ہے، جس سے ماحولیاتی امور میں شفافیت اور کارکردگی بہتر ہوگی۔

انہوں نے کہا کہ آن لائن نظام کے ذریعے ماحولیاتی منظوریوں، این او سیز، صنعتی رجسٹریشن، انسپیکشن، شکایات اور ریکارڈ کے عمل کو شفاف بنایا جائے گا۔ ماحولیاتی لائسنس کے لیے آن لائن درخواست اور تجدید، این او سی کی کارروائی، صنعتی رجسٹریشن اور قوانین پر عملدرآمد کی نگرانی میں بھی آسانی ہوگی۔

(جاری ہے)

فیصل احمد عقیلی کے مطابق شکایات کے اندراج اور ان کی پیش رفت کی نگرانی کے ساتھ انسپیکشن مینجمنٹ کو بھی مربوط نظام کا حصہ بنایا جائے گا۔

صنعتی اداروں کی جغرافیائی نقشہ سازی، حقیقی وقت میں ماحولیاتی ڈیٹا کی نگرانی اور ڈیجیٹل دستاویزات و ریکارڈ تک رسائی بھی ممکن ہوگی۔سیکریٹری ماحولیات نے بتایا کہ مصنوعی ذہانت پر مبنی چیٹ بوٹ شہریوں کو ماحولیاتی معاملات سے متعلق رہنمائی فراہم کرے گا جبکہ شہری اپنی شکایات کی پیش رفت بھی آن لائن دیکھ سکیں گے۔ سندھ انٹیگریٹڈ انوائرمنٹل مانیٹرنگ اینڈ مینجمنٹ انفارمیشن سسٹم کے ذریعے درخواستوں سے متعلق بروقت معلومات بھی فراہم کی جائیں گی۔

انہوں نے کہا کہ سیپا کی ڈیجیٹلائزیشن سے حکومتی اداروں کو بہتر نگرانی، خودکار طریقہ کار، مرکزی ماحولیاتی ڈیٹا بیس اور اعداد و شمار کی بنیاد پر شفاف فیصلہ سازی میں مدد ملے گی۔فیصل احمد عقیلی نے کہا کہ ٹیکنالوجی کے مؤثر استعمال کے ذریعے صاف، سرسبز اور صحت مند سندھ کے لیے جدید، شفاف اور مؤثر ماحولیاتی نظام کا قیام ترجیح ہے۔