جہاز مریم نواز کیلئے آیا ہے تو وہی بیٹھے گی، کیپٹن ر صفدر کا سرکاری جہاز کے استعمال کا دفاع

تم تو ایسے رو رہے ہو جیسے تمہارا جہاز استعمال کیا ہے، میں تو اس سے نہیں پوچھ سکتا، میرے ابے کا جہاز تو نہیں ہے؛ وزیراعلیٰ پنجاب کے شوہر کا صحافی کے سوال پر جواب

ساجد علی جمعرات 24 ستمبر 2026 13:17

جہاز مریم نواز کیلئے آیا ہے تو وہی بیٹھے گی، کیپٹن ر صفدر کا سرکاری ..

لاہور (اُردو پوائنٹ اخبارتازہ ترین۔ 24 ستمبر 2026ء) وزیراعلیٰ پنجاب مریم نواز کے سرکاری جہاز کے استعمال سے متعلق صحافی کے سوال پر ان کے شوہر اور مسلم لیگ ن کے رہنما کیپٹن ریٹائرڈ صفدر نے اپنے روایتی انداز میں ردِعمل دیتے ہوئے الزامات کو مسترد کر دیا۔ میڈیا کے نمائندوں سے گفتگو کے دوران ایک صحافی نے کیپٹن ریٹائرڈ صفدر سے مریم نواز کی جانب سے سرکاری جہاز کے استعمال پر سوال پوچھا، اس پر طنزیہ انداز اپناتے ہوئے کیپٹن ریٹائرڈ صفدر نے جواب دیا کہ ’تم تو ایسے رو رہے ہو جیسے تمہارا جہاز استعمال کیا ہے، سرکاری جہاز ہے استعمال کرلیا، وہ جہاز وزیراعلیٰ کے لیے ہی آیا ہے تو وہی بیٹھے گی، تم نے بیٹھنا ہے یا میں نے بیٹھنا ہے؟۔

اپنی بات کو مزید آگے بڑھاتے ہوئے کیپٹن ریٹائرڈ صفدر کا یہ بھی کہنا تھا کہ ’میں تو اس سے نہیں پوچھ سکتا، میرے ابے کا جہاز تو نہیں ہے‘، وزیراعلیٰ پنجاب مریم نواز کے شوہر کے اس غیر رسمی جواب کی ویڈیو سوشل میڈیا پر تیزی سے وائرل ہو گئی ہے۔

(جاری ہے)

کیپٹن صفدر 😂 pic.twitter.com/XvXjDYZsQd
— Aftab khan Niazi (@aftabniazi007) September 24, 2026

دوسری طرف وزیراعلیٰ پنجاب مریم نواز شریف کی جانب سے لندن کے نجی دورے کے لیے استعمال ہونے والے سرکاری طیارے کے 2 کروڑ 71 لاکھ 94 ہزار 4 روپے کے اخراجات جمع کروائے جانے کے بعد خاتون صحافی بینظیر شاہ نے اس معاملے میں شفافیت کے شدید فقدان کی نشاندہی کرتے ہوئے حکومتِ پنجاب سے چند بنیادی اور انتہائی اہم سوالات کے جوابات طلب کیے ہیں۔

اس ضمن میں اپنے موقّف کا اظہار کرتے ہوئے انہوں نے کہا کہ اگرچہ حکومت کی جانب سے یہ دعویٰ کیا جا رہا ہے کہ ایک ادائیگی کر دی گئی ہے اور اس کی رسیدیں بھی سامنے لائی گئی ہیں، لیکن اس پورے عمل میں شفافیت کا سخت فقدان نظر آتا ہے، کیا یہ 2 کروڑ 71 لاکھ روپے سے زائد کی رقم مریم نواز شریف کے اپنے ذاتی بینک اکاؤنٹ سے ادا کی گئی تھی یا اس کے لیے کوئی اور طریقہ اختیار کیا گیا؟ یہ بھاری رقم خاص طور پر کس کے اکاؤنٹ میں جمع کروائی گئی ہے؟ آیا یہ رقم پنجاب حکومت کے خزانے کے مرکزی اکاؤنٹ میں گئی ہے؟۔