وفاقی وزیرمنصوبہ بندی وترقی احسن اقبال کا گورنمنٹ کالج ویمن یونیورسٹی فیصل آباد کا دورہ، دو نئے ہاسٹلز کا افتتاح، بنو شاہین طالبات سے حلف لیا

جمعرات 24 ستمبر 2026 21:06

فیصل آباد (اُردو پوائنٹ اخبارتازہ ترین - اے پی پی۔ 24 ستمبر2026ء) وفاقی وزیر برائے منصوبہ بندی، ترقی و خصوصی اقدامات احسن اقبال نے گورنمنٹ کالج ویمن یونیورسٹی فیصل آباد کے نیو کیمپس کا دورہ کیا جہاں انہوں نے طالبات کے لئے نئے تعمیر شدہ دو ہاسٹلز کا افتتاح کیا اور بنو شاہین پروگرام میں شامل ہونے والی طالبات سے حلف لیا۔ہاسٹلز میں 350 طالبات کے رہائش کی گنجائش ہے۔

وفاقی وزیر نے بتایا کہ نیو کیمپس منصوبہ اپریل 2020 میں 1 ارب 26 کروڑ روپے کی لاگت سے منظور ہوا تھا تاہم ابتدائی تین برسوں میں صرف 18 کروڑ روپے جاری ہونے کے باعث منصوبہ تعطل کا شکار رہا۔ 2022 کے بعد منصوبے پر خصوصی توجہ دیتے ہوئے فنڈز کی فراہمی میں تیزی لائی گئی اور اب تک 96 کروڑ 50 لاکھ روپے جاری کئے جا چکے ہیں۔

(جاری ہے)

احسن اقبال نے کہا کہ خواتین کو معیاری تعلیم اور بہتر سہولیات کی فراہمی حکومت کی ترجیح ہے کیونکہ ملکی ترقی میں خواتین کا کردار بنیادی اہمیت رکھتا ہے۔

انہوں نے کہا کہ یونیورسٹی میں 11 ہزار طالبات کا زیر تعلیم ہونا پاکستان کے روشن مستقبل کی علامت ہے۔بنو شاہین پروگرام سے متعلق وفاقی وزیر نے کہا کہ اس کا مقصد نوجوانوں کو معاشرتی مسائل کے حل میں فعال کردار ادا کرنے کے قابل بنانا ہے، پروگرام کے تحت دس ،دس نوجوانوں کی ٹیمیں تشکیل دی جا رہی ہیں جو اپنے علاقوں کے مسائل کی نشاندہی کرکے ان کے حل کے لئے عملی کردار ادا کریں گی۔

انہوں نے نوجوانوں پر زور دیا کہ وہ سوشل میڈیا پر فیک نیوز اور منفی پروپیگنڈے سے محتاط رہیں اور کسی بھی خبر پر یقین کرنے سے پہلے اس کی تصدیق کریں۔ انہوں نے کہا کہ نوجوانوں کو مسائل کی شکایت کرنے کے بجائے مسائل حل کرنے والا بننا ہوگا۔وفاقی وزیر نے کہا کہ پاکستان کی ترقی کا سفر نوجوانوں کو قومی ترقی کا حصہ بنائے بغیر مکمل نہیں ہوسکتا، 2047 میں آزادی کے 100 سال مکمل ہونے تک پاکستان کو مضبوط اور ترقی یافتہ ملک بنانے کے لئے آج کی نوجوان نسل کو اپنا کردار ادا کرنا ہوگا۔

انہوں نے کہا کہ پاکستان کی ترقی کا سفر نوجوانوں کو اس کا سٹیک ہولڈر بنائے بغیر مکمل نہیں ہوسکتا، نوجوانوں کو قومی ترقی میں فعال کردار ادا کرنا ہوگا، اسی مقصد کے لئے وزارتِ منصوبہ بندی نوجوانوں کو قائدانہ صلاحیتوں سے آراستہ کرنے اور انہیں قومی ترقی کے عمل میں شامل کرنے کے لئے مختلف پروگرامز پر کام کر رہی ہے۔