وزیرداخلہ کا دورہ نیشنل پولیس اکیڈمی ، جاری ترقیاتی و اپ گریڈیشن منصوبوں کا معائنہ اور زیرِ تربیت افسران کے لیے تیار ماڈل رومز کا جائزہ لیا

جمعرات 1 اکتوبر 2026 15:03

اسلام آباد(اُردو پوائنٹ اخبارتازہ ترین - این این آئی۔ 01 اکتوبر2026ء) وفاقی وزیر داخلہ محسن نقوی نے نیشنل پولیس اکیڈمی کا دورہ کیا جہاں انہوں نے جاری ترقیاتی و اپ گریڈیشن منصوبوں کا معائنہ کیا اور زیرِ تربیت افسران کے لیے تیار کیے گئے ماڈل رومز کا جائزہ لیا۔ دورے کے دوران وزیر داخلہ کی زیرِ صدارت اعلیٰ سطحی اجلاس منعقد ہوا جس میں اکیڈمی میں جاری تعمیراتی و ترقیاتی کاموں پر پیش رفت کا تفصیلی جائزہ لیا گیا۔

وفاقی وزیر داخلہ نے اکیڈمی کے کانفرنس روم اور آڈیٹوریم کی ازسرِنو تعمیر کی ہدایت کرتے ہوئے زور دیا کہ تمام منصوبے جامع منصوبہ بندی، اعلی معیار اور مقررہ مدت کے اندر مکمل کیے جائیں۔ انہوں نے بتایا کہ وزیرِ مملکت برائے داخلہ نیشنل پولیس اکیڈمی کے اپ گریڈیشن منصوبوں کی روزانہ کی بنیاد پر مانیٹرنگ کر رہے ہیں۔

(جاری ہے)

محسن نقوی نے ہدایت کی کہ زیرِ تربیت افسران کو سواٹ (SWAT)ٹیموں کے طرز کے جدید ترین تربیتی آلات فراہم کیے جائیں تاکہ ان کی عملی استعدادِ کار میں اضافہ ممکن ہو سکے۔

انہوں نے مڈ کیریئر مینجمنٹ کورس کے لیے ملک کی بہترین اور ماہر فیکلٹی کی خدمات حاصل کرنے کی ہدایت بھی جاری کی۔اجلاس میں فیصلہ کیا گیا کہ ایم سی ایم سی کے نصاب میں جدید ڈیجیٹل پولیسنگ اور مصنوعی ذہانت کے خصوصی ماڈیولز شامل کرنے کی سفارش کی جائے گی۔ اس موقع پر گفتگو کرتے ہوئے وفاقی وزیر داخلہ نے کہا کہ پولیس افسران کی تربیت کو دورِ حاضر کے جدید تقاضوں سے ہم آہنگ کرنا فورس کی پیشہ ورانہ صلاحیتوں اور مجموعی معیار کو بہتر بنانے کے لیے ناگزیر ہے۔دورے اور اجلاس کے دوران کمانڈنٹ نیشنل پولیس اکیڈمی، کیپٹل ڈویلپمنٹ اتھارٹی (سی ڈی ای)کے اعلیٰ افسران اور دیگر متعلقہ حکام بھی موجود تھے۔