کراچی : اوورسیز ایمپلائمنٹ کے نام پر فراڈ میں ملوث ملزم گرفتار

ملزم نے متحدہ عرب امارات میں ملازمت دلوانے کے وعدے پر شہری سے 7 لاکھ 60 ہزار روپے وصول کیے، ترجمان ایف آئی اے

ہفتہ 3 اکتوبر 2026 17:31

کراچی(اُردو پوائنٹ اخبارتازہ ترین - این این آئی۔ 03 اکتوبر2026ء) ایف آئی اے اینٹی ہیومن ٹریفکنگ سرکل کراچی نے اوورسیز ایمپلائمنٹ کے نام پر فراڈ میں ملوث ملزم کو گرفتار کر لیا۔ترجمان ایف آئی اے کے مطابق گرفتار ملزم رئیس احمد علوی ولد اعجاز احمد نے شہری کو متحدہ عرب امارات میں ملازمت دلوانے کا جھانسہ دے کر 7 لاکھ 60 ہزار روپے ہتھیا لیے۔

(جاری ہے)

ایف آئی اے کا کہنا ہے کہ واقعے کا مقدمہ ایمیگریشن آرڈیننس 1979 کی دفعہ 22(b) کے تحت درج کیا گیا ہے۔

ترجمان کے مطابق دورانِ تفتیش یہ بات سامنے آئی ہے کہ ملزم بطور اوورسیز ایمپلائمنٹ پروموٹر (OEP) رجسٹرڈ نہیں تھا۔ایف آئی اے نے مزید بتایا کہ تفتیش کے دوران بینکنگ ریکارڈ اور دیگر دستاویزی شواہد بھی حاصل کر لیے گئے ہیں جبکہ کیس کی مزید تفتیش جاری ہے۔