Live Updates

کیمپ ڈیوڈ میں خفیہ اجلاس، ٹرمپ انتظامیہ کی ایران اور یمن کی صورتحال پر اہم مشاورت

اجلاس میں ایران تنازع اور سعودی عرب و حوثیوں کے درمیان یمن میں بڑھتی کشیدگی پرامریکی اقدامات پر غور

میاں محمد ندیم ہفتہ 3 اکتوبر 2026 19:27

کیمپ ڈیوڈ میں خفیہ اجلاس، ٹرمپ انتظامیہ کی ایران اور یمن کی صورتحال ..

واشنگٹن(اردوپوائنٹ اخبارتازہ ترین-انٹرنیشنل پریس ایجنسی۔03 اکتوبر ۔2026 ) امریکی صدر ڈونلڈ ٹرمپ کی اعلیٰ قومی سلامتی ٹیم نے کیمپ ڈیوڈ میں کئی گھنٹے جاری رہنے والے ایک غیر اعلانیہ اجلاس میں ایران اور یمن میں جاری کشیدگی کی صورتحال پر اہم مشاورت کی ہے امریکی خبررساں ادارے” ایکسیوس“ کے مطابق اجلاس کی صدارت نائب صدر جے ڈی وینس نے کی جبکہ وزیر خارجہ مارکو روبیو، وزیر دفاع پیٹ ہیگستھ، وائٹ ہاﺅس کے خصوصی ایلچی اسٹیو وٹکوف، سی آئی اے کے ڈائریکٹر جان ریٹکلف اور چیئرمین جوائنٹ چیفس آف اسٹاف جنرل ڈین کین بھی اجلاس میں شریک ہوئے‘خبر میں یہ نہیں بتایا گیا کہ صدرٹرمپ اجلاس میں کیوں شریک نہیں ہوئے.

(جاری ہے)

رپورٹ کے مطابق اجلاس میں ایران کے ساتھ جاری تنازع اور سعودی عرب و حوثیوں کے درمیان یمن میں بڑھتی کشیدگی سے متعلق آئندہ اقدامات پر غور کیا گیا تین امریکی حکام نے ”ایکسیوس“ کو بتایا کہ اجلاس میں بعض معاملات پر فیصلے کیے گئے یا کم از کم ان پر تفصیلی تبادلہ خیال ہوا کیمپ ڈیوڈ اجلاس امریکی انتظامیہ کی جانب سے باضابطہ طور پر اعلان نہیں کیا گیا تھا.

رپورٹ کے مطابق اس نوعیت کا آخری غیر معمولی اجلاس جون 2025 میں ہوا تھا، جو ایران سے متعلق جنگ کے آغاز سے چند روز قبل منعقد ہوا تھا ایران کے معاملے میں امریکی حکام کی توجہ مذاکرات میں تعطل کے بعد آئندہ حکمت عملی پر مرکوز ہے” ایکسیوس“ کے مطابق صدر ٹرمپ ایران کے خلاف بڑے پیمانے پر دوبارہ فوجی کارروائی کے امکان پر غور کر رہے ہیں، تاہم حتمی فیصلہ سامنے نہیں آیا.

دوسری جانب سعودی عرب یمن میں حوثیوں کے خلاف کارروائی کی تیاری کر رہا ہے اور واشنگٹن سے ممکنہ فضائی مدد کے لیے بھی رابطہ کیا گیا ہے”رائٹرز“ کے مطابق سعودی عرب باب المندب کے اہم بحری راستے پر کنٹرول بحال کرنے کے لیے یمنی فورسز کی مدد سے ممکنہ بڑے آپریشن کے مختلف منصوبوں پر غور کر رہا ہے. رپورٹ کے مطابق صدر ٹرمپ نے جمعے کو صحافیوں سے گفتگو میں ایران سے متعلق اپنے آئندہ اقدام کے بارے میں تفصیلات بتانے سے گریز کیا اور کہا کہ اگر وہ معلومات ظاہر کردیں تو یہ ایک بڑی خبر بن جائے گی دوسری جانب وائٹ ہاﺅس نے کیمپ ڈیوڈ میں ہونے والے اس اجلاس کے بارے میں تبصرے کی درخواست کا فوری جواب نہیں دیا.