اے این ایف کا منشیات سمگلنگ کے خلاف کریک ڈاؤن، 11 ملزمان گرفتار

پیر 5 اکتوبر 2026 14:49

کراچی(اُردو پوائنٹ اخبارتازہ ترین - این این آئی۔ 05 اکتوبر2026ء) اینٹی نارکوٹکس فورس (اے این ایف) نے تعلیمی اداروں کے اطراف اور ملک کے مختلف شہروں میں منشیات سمگلنگ کے خلاف کارروائیوں کے دوران 11 ملزمان کو گرفتار کرلیا۔ترجمان اے این ایف کے مطابق 7 کارروائیوں میں مجموعی طور پر 34.317 کلوگرام منشیات برآمد کی گئی جن کی مالیت 85 لاکھ روپے سے زائد ہے۔

راولپنڈی میں جی ٹی روڈ پر یونیورسٹی کے قریب کارروائی کے دوران ملزم کے قبضے سے 1.4 کلوگرام چرس برآمد ہوئی، گرفتار ملزم نے تعلیمی اداروں کے طلبا کو منشیات فروخت کرنے کا اعتراف کیا۔ترجمان کے مطابق اسلام آباد ایئرپورٹ پر ریاض جانے والے مسافر کی واسکٹ میں جذب 1.072 کلوگرام آئس برآمد ہوئی، جبکہ ملتان ایئرپورٹ پر شارجہ جانے والے مسافر کے بیگ سے 745 گرام وزنی 1080 ایکسٹیسی گولیاں برآمد کرکے ملزم کو گرفتار کرلیا گیا۔

(جاری ہے)

فیض آباد بس ٹرمینل کے قریب گیزر میں چھپائی گئی 12 کلوگرام چرس برآمد کرکے ایک ملزم کو گرفتار کیا گیا، ہیڈ محمد والا انٹرچینج ملتان کے قریب ایک گاڑی سے 10 کلوگرام آئس برآمد کرکے 2 ملزمان کو گرفتار کیا گیا.اے این ایف کے مطابق ظفروال روڈ سیالکوٹ کے قریب موٹر سائیکل سوار ملزم سے 6.5 کلوگرام چرس اور پستول برآمد ہوا جبکہ چونگی نمبر 26 اسلام آباد کے قریب گاڑی سے 1.4 کلوگرام افیون، 1.2 کلوگرام چرس اور بھاری مقدار میں غیر قانونی اسلحہ برآمد کرکے 4 ملزمان کو گرفتار کیا گیا۔ترجمان کے مطابق گرفتار ملزمان کے خلاف انسدادِ منشیات ایکٹ 1997 کے تحت مقدمات درج کرکے تحقیقات کا آغاز کردیا گیا ہے۔