شام : اتحادی افواج نے داعش سے الرقہ ہسپتال کا قبضہ حاصل کرلیا

نیشنل ہسپتال کو آزاد کرالیا گیا ، 22 غیرملکی دہشت گرد بھی لاک ہوگئے، ایس ڈی ایف

منگل 17 اکتوبر 2017 20:22

دمشق (اُردو پوائنٹ اخبار آن لائن۔ بدھ 18 اکتوبر 2017ء)شام میں دہشت گردوں کے خلاف امریکی سربراہی میں لڑنے والے اتحاد شامی ڈیموکریٹک اتحاد (ایس ڈی ایف) نے دعویٰ کیا ہے کہ اس نے الرقہ کے ریاستی ہسپتال کا قبضہ حاصل کرلیا ہے جو دولت اسلامیہ (داعش) کا اس علاقے میں آخری مراکز میں سے ایک تھا۔ایس ڈی ایف کا کہنا ہے کہ 'نیشنل ہسپتال کو آزاد کرالیا گیا ہے جبکہ 22 غیرملکی دہشت گرد بھی لاک ہوگئی'۔

ان کا کہنا تھا کہ 'میونسپل اسٹیڈیم کے قریب شدید لڑائی جاری ہی' جو داعش کا ایک اور مرکز ہے۔خیال رہے کہ ایس ڈی ایف نے تازہ پیش رفت داعش کی جانب سے الرقہ میں عوام کے سرقلم کرنے کے واقعات سامنے آنے کے بعد کی ہے۔یاد رہے کہ امریکی سربراہی میں قائم اتحاد ایس ڈی ایف نے رواں سال جون میں الرقہ میں داعش سے علاقے کے حصول کے لیے فیصلہ کن لڑائی شروع کی تھی اور تاحال شہر کے 90 فیصد علاقے پر قبضہ جمالیا ہے۔

(جاری ہے)

الرقہ کا شمار شام کے بڑے شہروں میں ہوتا ہے جس کو داعش نے شام میں اپنا مرکز بنا لیا تھا۔ایس ڈی ایف کے مطابق تازہ کارروائی کے بعد اس شہر میں اب داعش کے 300 جنگجو باقی رہ گئے ہیں۔یاد رہے کہ گزشتہ ماہ ہیومن رائٹس واچ (ایچ آر ڈبلیو) نے اپنی رپورٹ میں انکشاف کیا تھا کہ الرقہ میں امریکی سربراہی میں اتحادی فوج نے صرف مارچ کے مہینے میں 84 شہریوں کو ہلاک کیا تھا۔

رواں سال جولائی میں امریکی اتحادیوں کی جانب سے الرقہ میں ایک ماہ کے دوران صرف فضائی حملوں میں 224 شہریوں کو ہلاک کیے جانے کی رپورٹ سامنے آگئی تھی جبکہ دیگر کارروائیوں میں درجنوں شہری اور جنگجو ہلاک ہوگئے تھے۔برطانوی انسانی حقوق کی تنظیم سیریئن آبزرویٹری برائے انسانی حقوق کا کہنا تھا کہ داعش کے مضبوط گڑھ الرقہ میں امریکی اتحادیوں کی حمایت یافتہ شامی جمہوری فورسز (ایس ڈی ایف) کے جنگجو قریباً ایک ماہ قبل داخل ہوئے تھے اور اس دوران امریکی اور دوسرے ممالک کے لڑاکا طیاروں کی شہری علاقوں پر بمباری میں اتنی بڑی تعداد میں ہلاکتیں ہوئی ہیں۔

امریکی اتحادیوں کی فضائی کارروائی میں ہلاک ہونے والوں میں 38 بچے اور 28 خواتین بھی شامل ہیں۔واضح رہے کہ امریکا نے عراق میں جاری کارروائیوں کو وسعت دیتے ہوئے 23 ستمبر 2014 کو شام میں داعش کے خلاف آپریشن شروع کیا تھا۔۔