بہاولپور میں 10 چینی انجینئرز اور عملہ کورونا وائرس کا شکار، ہسپتال منتقل

حالت بہتر ہے اور عملہ ان کی نگرانی کر رہا ہے، چینی مریضوں کے آنے سے قبل عملہ بہت اطمینان سے تھا ،فوکل پرسن ڈاکٹر حامد

ہفتہ 25 جولائی 2020 16:50

بہاولپور(اُردو پوائنٹ اخبارتازہ ترین - این این آئی۔ 25 جولائی2020ء) چین کے 10 انجینئرز اور عملے کے افراد کے کورونا وائرس کے ٹیسٹ وائرس کے ٹیسٹ مثبت آنے کے بعد ہسپتال میں داخل کرا دیا گیا۔میڈیا رپورٹ کے مطابق چینی انجینئرز بہاولپور میں حاصل پور روڈ سے 45 کلومیٹر دور خیرپور تمے والی کے قریب توانائی کے منصوبے پر کام کر رہے تھے جہاں وہ کورونا وائرس کا شکار ہوئے اور انہیں شہر لے کر آیا گیا،ان تمام افراد کو قانون نافذ کرنے والے اداروں کی سخت سیکیورٹی میں ہسپتال میں داخل کردیا گیا ۔

(جاری ہے)

جھانگی والی روڈ بی وی ایچ 2 میں کورونا وائرس کے علاج کے فوکل پرسن ڈاکٹر حامد نے کہا کہ چینی شہریوں کو یہاں لایا گیا اور ان کے ٹیسٹ مثبت آئے۔انہوں نے کہا کہ ان کی حالت بہتر ہے اور عملہ ان کی نگرانی کر رہا ہے، چینی مریضوں کے آنے سے قبل عملہ بہت اطمینان سے تھا کیونکہ کورونا وائرس کی وبا کے بعد سے گزشتہ تین ماہ میں تمام مریض صحتیاب ہونے کے بعد ہسپتال میں اس وقت کورونا کا کوئی بھی مصدقہ مریض نہیں تھا۔انہوں نے کہا کہ ہمیں یقین ہے کہ ڈاکٹرز اور عملے کی بھرپور نگرانی کی بدولت چینی مریض جلد صحتیاب ہو جائیں گے۔