سابق وزیراعظم سے ملنے کی جلدی، صدیق الفاروق سیڑھیوں سے گر گئے

جمعرات 15 نومبر 2018 17:17

اسلام آباد (اُردو پوائنٹ اخبارتازہ ترین - این این آئی۔ 15 نومبر2018ء) پاکستان مسلم لیگ (ن )کے رہنما صدیق الفاروق اپنے قائد نواز شریف سے ہاتھ ملانے کی کوشش میں احتساب عدالت کی سیڑھیوں پر گر گئے۔سابق وزیراعظم نواز شریف العزیزیہ سٹیل مل ریفرنس کی سماعت کیلئے اسلام آباد کی احتساب عدالت پہنچے تو اس موقع پر مسلم لیگ کے کئی رہنما ان کے استقبال کے لیے جوڈیشل کمپلیکس میں موجود تھے۔

(جاری ہے)

جیسے ہی نواز شریف گاڑی سے باہر آئے شکیل اعوان، سلیم ضیاء اور مسلم لیگ ن کے دیگر رہنما سابق وزیراعظم سے مصافحہ کرنے کیلئے آگے آگئے۔سکیورٹی اہلکاروں نے رہنماؤں کو آگے سے ہٹانے کی کوشش کی تو بدنظمی ہوگئی۔ اسی دوران سیڑھیوں پر کھڑے متروکہ وقف املاک بورڈ کے سابق چیئرمین صدیق الفاروق نے آگے بڑھ کر نواز شریف کی طرف جوں ہی ہاتھ بڑھایا تو پیچھے کھڑے افراد کا دھکا لگنے سے وہ اپنا توازن کھو بیٹھے اور سیڑھیوں پر گر گئے۔نواز شریف سمیت دیگر رہنماؤں نے بھی صدیق الفاروق کو بچانے کی کوشش کی مگر کامیاب نہ ہوسکے۔ صدیق الفاروق زمین پر گرنے کے باوجود نواز شریف سے ہاتھ ملانے میں کامیاب رہے اور اٹھ کر ان کے ساتھ ہی کمرہ عدالت میں چلے گئے۔