ْراحت فتح علی خان کے ہمراہ گایاہواحمزہ ملک کا نیا گانا "اوجانا"بالی ووڈ سے ریلیز کردیا گیا

کراچی ۔ (اُردو پوائنٹ اخبارتازہ ترین - اے پی پی۔ 22 جولائی2018ء) سرسنگیت کا جادوجگانے والے حمزہ ملک اور معروف سنگر راحت فتح علی خان کا مشترکہ گانا "اوجاناں "ہفتہ کو بالی ووڈ سے ریلیز کردیا گیا، گانے کی موسیقی ماہر موسیقار ساحر علی بھگا نے تیار کی ہے، جبکہ ہدایات فرحان سعید نے دی ہیں۔ جاری کردہ اعلامیہ کے مطابق یہاں یہ بات قابل ذکر ہے کہ یوٹیوب پر -"اوجاناں "کا پرومو صرف دوروز میں ایک ملین سے زائد ویوزحاصل کرنے میں کامیاب ہوچکا ہے جبکہ شائقین پورا گانا ریلیز ہونے کا بے صبری سے انتظار کررہے ہیں، گانے کی ویڈیو میں خوبصورت ماڈل اقراء عزیز بھی شامل ہیں جوکہ از خود اس گانے میں سنگر بھی ہیں۔

حمزہ ملک کا یہ گانا اپنے سامعین کے موڈ کو خوشگواریت میں تبدیل کردیتا ہے جبکہ راحت فتح علی خان نے "نئی لگدا تیرے بن دل میرا سوہنیا" کو نہایت ہی خوبصورتی سے گایا ہے، جسے سننے والوں کو بار بار پورا گانا سننے کا دل کرتا ہے۔

(جاری ہے)

میوزک انڈسٹری میں حمزہ ملک کا نام کوئی نیا اضافہ نہیں ہے، وہ اس سے قبل "تیرے بنا ، محرمہ، ڈھولنا، عادت اور داستان میں اپنی آواز کا جادوجگا چکے ہیں، جسے شائقین کی جانب سے بے حد پذیرائی حاصل ہوچکی ہے، ان کی موسیقی میں ایک انوکھا انداز اور احساس نمایاں ہے۔

اس موقع پر اپنے خیالات کااظہار کرتے ہوئے حمزہ ملک کا کہنا تھا کہ یہ گانا "اوجاناں" میرے دل کے قریب ہے، میں نے اس گانے کو بہترین بنانے کے لیے بہت محنت کی ہے۔ انہوں نے کہا کہ لیجنڈری گلوکار راحت فتح علی خان کے ساتھ کام کرنا کوئی عام بات نہیں ہے، مجھے امید ہے کہ شائقین کو میری یہ کاوش ضرور پسند آئے گی۔