پی آئی اے کا جشن آزادی کے موقع پر کرایوں میں رعایت کا اعلان

جمعہ 7 اگست 2020 01:05

کراچی۔6 اگست(اُردو پوائنٹ اخبارتازہ ترین - اے پی پی۔ 07 اگست2020ء) پاکستان انٹرنیشنل ایئرلائن (پی آئی ای) نے اپنے مسافروں کے لیے ملک کے 73 ویں جشن آزادی کے موقع پر کرایوں میں رعایت کا اعلان کیا ہے ۔ جمعرات کو ترجمان پی آئی اے نے بتایا کہ 73 ویں یوم آزادی پر اسلام آباد، کراچی اور لاہور کے درمیان چلنے والی پروازوں کے کرایوں میں 14فیصد رعایت ہو گی ،اس یاد گار پر ہر مسافر کو غیر معمولی طور پر73 کلوگرام مفت سامان ساتھ لے جانے کی بھی پیش کش بھی کی گئی ہے ۔

(جاری ہے)

پی آئی اے کی جانب سے یوم آزادی پر یہ ایک انوکھی پیشکش ہے ،یہ سکیم 07 اگست سے 14 اگست تک لاگو رہے گی۔ اس کے ساتھ ہی پی آئی اے نے یوم آزادی کے موقع پر قوم کے ساتھ اظہار یکجہتی کرنے کے لئے ملتان، سکھر اور گوادر سے اپنی پروازیں دوبارہ شروع کرنے کا بھی اعلان کیا ہے،13 اگست سے ان شہروں کو ملک کے دیگر مقامات سے منسلک کر دیا جائے گا۔ جشن آزادی پیکج کا مقصد اس تاریخی دن پرلوگوں میں خوشیاں بانٹنا ہے ۔ اس عظیم دن پی آئی اے قوم سے عہد کرنا چاہتی ہے کہ ہر مشکل میں ہم اپنی قوم کے شانہ بشانہ کھڑے ہیں ۔