فی تولہ سونے کی قیمت میں بڑا اضافہ، نئی قیمت 3 لاکھ 84 روپے کی بلند ترین سطح پر پہنچ گئی

کراچی ( اردوپوائنٹ اخبار تازہ ترین۔ آئی پی اے۔ 08 ستمبر 2025ء ) عالمی مارکیٹ میں سونے کی قیمتوں میں اتار چڑھاؤ کا سلسلہ جاری ہے، عالمی منڈی میں سونے کے نرخ بڑھنے پر پاکستان میں بھی قیمتوں میں نمایاں اضافہ ہوگیا ہے۔ میڈیا رپورٹ کے مطابق عالمی مارکیٹ میں سونے کی قیمتوں میں اضافہ ہونے کے باعث پاکستان میں بھی سونے کی قیمت بڑھ گئی ہے۔ بڑے اضافے کے بعد فی تولہ سونے کی نئی قیمت بلند ترین سطح پر پہنچ گئی ہے۔

آج ملک کی صرافہ مارکیٹوں میں فی تولہ سونا 6 ہزار 100 روپے مہنگا ہوا ہے، جس کے باعث فی تولہ سونے کی نئی قیمت بڑھ کر3 لاکھ 84 روپے کی بلند ترین سطح پر پہنچ گئی ہے۔ اسی طرح دس گرام سونے کی قیمت بھی بڑھ گئی ہے۔ 10 گرام سونے کی قیمت میں 5 ہزار 230 روپے کا اضافہ ہوا ہے۔

(جاری ہے)

نئی قیمت 3 لاکھ 29 ہزار 219 روپے کی سطح پر پہنچ گئی ہے۔ دوسری جانب نیوزایجنسی کے مطابق زرمبادلہ کے ملکی ذخائر میں کیلنڈر سال کے آغاز سے لے کر اب تک 3.73 ارب ڈالر کا اضافہ ریکارڈ کیا گیا ہے۔

سٹیٹ بینک کی جانب سے جاری کردہ اعدادوشمار کے مطابق گزشتہ کیلنڈر سال کے اختتام پر زرمبادلہ کے ملکی ذخائر کا حجم 15.92 ارب ڈالر ریکارڈ کیا گیا تھا ، جس میں سٹیٹ بینک کے پاس زرمبادلہ کے ذخائر کا حجم 11.73 ارب ڈالر اور کمرشل بینکوں کے پاس زرمبادلہ کے ذخائر کا حجم 4.195 ارب ڈالر ریکارڈ کیا گیا تھا۔ 29 اگست کو ختم ہونے والے ہفتے میں زرمبادلہ کے ملکی ذخائر کا حجم 19.660 ارب ڈالر ریکارڈ کیا گیا جس میں سٹیٹ بینک کے پاس زرمبادلہ کے ذخائر کا حجم 14.30 ارب ڈالر اور بینکوں کے پاس زرمبادلہ کے ذخائر کا حجم 5.35 ارب ڈالر ریکارڈ کیا گیا جو دو ماہ کی درآمدات کےلئے کافی ہے۔

جاری کیلنڈر سال کے آغاز سے لے کر اب تک سٹیٹ بینک کے پاس موجود زرمبادلہ کے ذخائر میں 2.571 ارب ڈالر اور کمرشل بینکوں کے پاس زرمبادلہ کے ذخائر کے حجم میں 1.161 ارب ڈالر کا اضافہ ریکارڈ کیا گیا ہے۔