-کے الیکٹرک نے کراچی میں اجتماعی سزاؤں کا نظام رائج کردیا ،وزیر بلدیات سندھ سعید غنی

.کراچی(اُردو پوائنٹ اخبارتازہ ترین - آن لائن۔ 21 مئی2024ء) وزیر بلدیات سندھ سعید غنی نے کہا ہے کہ کے الیکٹرک نے کراچی میں اجتماعی سزاؤں کا نظام رائج کردیا ہے۔ چند لوگ بجلی چوری کرتے ہیں تو پورے علاقے کو سزا دی جاتی ہے۔ گرمی کی وجہ سے کو انتقال کرتا ہے تو اس کی ایف آئی آر کے الیکٹرک کے خلاف داخل ہونا چاہئے۔ ان خیالات کا اظہار انہوں نے منگل کے روز سندھ اسمبلی میں پیپلز پارٹی کی خاتون رکن ہیر اسماعیل سوہو کی جانب سے حیسکو، سیپکو اور کے الیکٹرک کے خلاف پیش کردہ قرارداد پر خطاب کرتے ہوئے کیا۔

سعید غنی نے کہا کہ کسی مہذب معاشرے میں اجتماعی سزاؤں کا نظام نہیں لیکن بدقسمتی سے کے الیکٹرک نے کراچی میں اجتماعی سزائوں کا نظام رائج کردیا ہے۔ انہوں نے کہا کہ یہاں جو بل ادا کرتے ہیں وہ بھی ظالمانہ لوڈ شیڈنگ کا شکار ہیں، چند لوگ بجلی چوری کرتے ہیں تو پورے علاقے کو سزا دی جاتی ہے۔

(جاری ہے)

سعید غنی نے کہا کہ کراچی میں بارہ گھنٹے اعلانیہ و غیر اعلانیہ لوڈ شیڈنگ ہے۔

کے الیکٹرک ظلم،جبر اور زیادتیاں کررہا ہے۔ انہوں نے کہا کہ کے الیکٹرک کو انسانی مسئلہ سمجھ کر دیکھنا چاہئے۔ یہاں امتحانات چل رہے اکثر امتحانی سینٹر میں بجلی نہیں ہے، ایسی گرمی میں بغیر بجلی کے بیٹھنے والا بچہ کیا نتیجہ دے گا۔ سعید غنی نے کہا کہ بجلی بارہ گھنٹے بند رہتی ہے تو پانی کا مسئلہ بھی شدت اختیار کر جاتا ہے۔ سعید غنی نے کہا کہ گرمی کی وجہ سے اگر کوئی شخص انتقال کرتا ہے تو اس کی ایف آئی آر کے الیکٹرک کے خلاف داخل ہونا چاہئے۔

سعید غنی نے کہا کہ بحثیت عوام میں سمجھتا ہوں کہ کے الیکٹرک کے دفتروں میں گھس کر ان کی بجلی بند کرکے ان کو دس گھنٹے گرمی میں بغیر بجلی کے بٹھائیں تاکہ ان کو احساس ہو کہ عوام کسی طرح اپنے چھوٹے چھوٹے گھروں اور فلیٹس میں 12 گھنٹے لوڈشیڈنگ میں زندگی گزارنے پر مجبور ہیں۔ سعید غنی نے کہا کہ بجلی چوری کو جواز بنا کر لوڈشیڈنگ کرنے والی کے الیکٹرک شہر میں کنڈے لگانے میں خود ان کا عملہ ملوث ہوتا ہے اور وہ اسی کو جواز بنا کر لوڈشیڈنگ بھی کرتے ہیں۔

انہوں نے کہا کہ کئی علاقوں میں کے الیکٹرک والے پی ایم ٹی لے کر جاتے ہیں اور چار چار پانچ پانچ دن بجلی بند رہتی ہے۔ چھوٹے گھروں میں رہنے والے لوگ احتجاج نہیں کریں گے تو کیا کریں گے۔ سعید غنی نے کہا کہ ظلم تو یہ ہے کہ عوام سڑکوں پر کے الیکٹرک کے خلاف سڑکوں پر احتجاج کرتی ہے اور ایف آئی آر ریاست کی بجائے کے الیکٹرک کرواتی ہے۔ کے الیکٹرک نے غنڈہ گردی اور بدمعاشی مچا رکھی ہے۔ سعید غنی نے کہا کہ کے الیکٹرک کے مسئلے پر سندھ حکومت کردار ادا کرے گی اور اس حوالے سے وفاق کو بھی تمام صورتحال سے آگاہ کیا گیا ہے۔#