سہ روزہ انسداد پولیو مہم کا آغاز آج ہوگا،45ہزار سے زائد ٹیمیں تشکیل دیدی گئیں

لاہور۔23 ستمبر(اُردو پوائنٹ اخبارتازہ ترین - اے پی پی۔ 23 ستمبر2018ء) صوبہ بھر میں سہ روزہ انسداد پولیو مہم کا آغاز آج سوموار کو ہو گا ، 45ہزار سے زائد ٹیمیں تشکیل دے دی گئیں، ٹیمیں گھر گھر جا کر بچوں کو پولیو سے بچائو کے قطرے پلائیں گی، اس کے علاوہ لاری اڈوں، ریلوے سٹیشنوں اور اہم مقامات پر بھی ٹیمیں موجود رہیں گی، صوبائی وزیر صحت ڈاکٹر یاسمین راشد نے کہا کہ پاکستان کو پولیو سے پاک ملک بنانے کا ہدف حاصل کرنے کے لئے تمام ممکنہ وسائل بروئے کار لائے جارہے ہیں۔

پولیو فری پاکستان کے لئے ہر بچے تک پہنچنا اور مشنری جذبے سے کام کرنا ضروری ہے۔ انہوں نے اس عزم کا اظہار کیا کہ پاکستان کا کوئی بچہ پولیو جیسی ناقابل علاج بیماری کا شکار نہیں بننے دیں گے۔ انہوںنے والدین اور اساتذہ کرام سے اپیل کی کہ وہ انسداد پولیو مہم کے دوران 5سال تک عمر کے بچوں کو ویکیسن کے قطرے پلوائیں اور اس عظیم مقصد کے حصول میں حکومت کے ہاتھ مضبوط کریں۔

(جاری ہے)

دریں اثنا پنجاب ایمرجنسی آپریشن کے کوآرڈی نیٹر اور ڈی جی ہیلتھ ڈاکٹر منیر اکرم نے بتایا کہ پے در پے انسداد پولیو مہم کے باعث اگرچہ پنجاب میں پولیوکا کوئی نیا کیس سامنے نہیں آیا تاہم راولپنڈی اور لاہور میں بعض مقامات سے پولیو کے ماحولیاتی سیمپل مثبت آنے کے بعد کسی سستی یا غفلت کی گنجائش نہیں، انسداد پولیو مہم کے لئے اضلاع میں تمام انتظامات مکمل ہیں تاہم کسی معلومات یا مدد کے لئے ٹال فری ہیلپ لائن 0800-99000 پر بھی رابطہ کیا جاسکتا ہے۔