حکومت کو معاشی چیلنجز ورثے میںملے،انشاء اللہ ملک جلد بہتری کی طرف جائے گا ‘اعجازچوہدری

پاکستان کی تاریخ میں پہلی مرتبہ طاقت وار طبقے کا بے لاگ اور بلا تفریق احتساب ہو رہا ہے‘رہنما تحریک انصاف

منگل 23 اپریل 2019 15:10

لاہور (اُردو پوائنٹ اخبارتازہ ترین - این این آئی۔ 23 اپریل2019ء) پاکستان تحریک انصاف کے مرکزی ایڈیشنل سیکرٹری جنرل اعجازاحمد چوہدری کہاہے کہ پاکستان کی تاریخ میں پہلی مرتبہ طاقت وار طبقے کا بے لاگ اور بلا تفریق احتساب ہو رہا ہے، وزیراعظم حالات کے پیش نظر جو اقدامات کر ر ہے ہیں اس کے ثمرات جلد قوم کو ملیں گے ، وزیراعظم عمر ا ن خان نے دوٹوک الفاظ میں کہ دیاہے کہ جو کام نہیں کر ے گا وہ وزرات کا حصہ نہیں رہے گا،پی ٹی آئی حکومت کو معاشی چیلنجز ورثے میںملے،انشاء اللہ ملک جلد بہتری کی طرف جائے گا اور عمران خان کی قیادت میں نیا پاکستان بنے گا۔

وہ گزشتہ روزپارٹی آفس میں پنجاب کے مختلف اضلاع سے ملاقات کے لیے آئے ہوئے پارٹی رہنمائوں اور کارکنوں سے گفتگو کررہے تھے ۔

(جاری ہے)

انہوں نے کہاکہ اربوں ڈالرز کا بلیک ہول (ن) لیگ چھوڑ کر گئی،اسد عمر سے پہلے بھی تمام وزرائے خزانہ آئی ایم ایف کے پاس گئے، پاکستان 16 بار آئی ایم ایف کے پاس جاچکا ہے،آئی ایم ایف کے پاس جانے کی وجہ سستا قرضہ ہے، وزیراعظم عمران خان کہا چکے ہیں کہ ہم ایم ایف کے پاس خوشی سے نہیں جار ہے ۔انہوں نے مزید کہاکہ نواز شریف اور آصف زرداری کاطریقہ واردات ایک ہی ہے ، ایف آئی اے نے تحقیقات سے پانچ ہزار کے قریب جعلی اکاونٹس پکڑے ان جعلی اکاونٹس کو چلانے کے لیے 32 بڑے اکاونٹ بنائے گئے سارے نیٹ ورک میں آصف زرداری کے کار خاص اومنی گروپ شامل تھا۔