پرائیویٹ تعلیمی اداروں نے IMUکیخلاف اداروں کی بندش کااعلان کردیا

پشاور(اُردو پوائنٹ اخبارتازہ ترین - این این آئی۔ 16 اپریل2018ء)پرائیویٹ ایجوکیشن نیٹ ورک(PEN)نے نجی تعلیمی اداروں کوIMUکی سرپرستی میں دینے کے خلاف رواں ہفتے دو دن کیلئے ادارے بندکرنے کااعلان کردیا اور اس حوالے سے تمام ڈسٹرکٹ صدور کو ہدایات جاری کردی ہیں اداروں کی بندش کیلئے دن کاچنائو آج کیاجائے گا۔پرائیویٹ تعلیمی اداروں کی نمائندہ تنظیمPENکے صوبائی صدرسلیم خان نے میڈیاسے گفتگوکرتے ہوئے کہاکہ تمام ادارے آئین کے پابند ہیںغیر ملکی ڈونر ایجنسی کی تعلیم دشمن پالیسیاں قوم کے مستقبل کا ستیاناس ثابت ہوں گی ماہرین تعلیم اور محب وطن لوگوں کی مشاورت کے بغیر غیر ملکی ڈونرز کے ایما پر تعلیمی نظام میں تعلیم کش پالیسیوں کا نفاذ سراسر غیر قانونی اور دینی وقومی اقدار کو کچلنے کے برابر ہے ایسے فیصلے نہ پہلے کبھی تسلیم کئے نہ اب کریں گے۔

(جاری ہے)

انہوں نے کہاکہ صوبائی حکومت اوروزیرتعلیم ہٹ دھرمی کامظاہرہ چھوڑ کر ریگولیٹری اتھارٹی کے نام پر نجی تعلیمی اداروں کو دبائو میں لانے کے خواب دیکھناچھوڑدیںاور ڈسٹرکٹ سکروٹنی کمیٹی کا نوٹس فی الفور منسوخ کرے بصورت دیگر ہم رواں ہفتے دودن کیلئے صوبہ بھرمیں احتجاجاًادارے بندکرنے کااعلان کرتے ہیں اوراگر حکومت نے پھربھی سنجیدگی نہ دکھائی تو احتجاج کادائرہ مزیدوسیع کردینگے۔سلیم خان کے مطابق احتجاج کے حوالے سے تمام ڈسٹرکٹ صدور کو ہدایات جاری کردی گئی ہیں اوروقتی اورطویل المدتی لائحہ عمل طے کرنے کیلئے پالیسی بنالی ہے ہمارااحتجاج آئندہ الیکشن تک جاری رہے گا۔