ڑ*محلہ عباسیہ میں پانی کی شدید قلت، مکین در بدر کی ٹھوکریں کھانے پر مجبور

+کوئٹہ (اُردو پوائنٹ اخبارتازہ ترین - آن لائن۔ 14 جون2025ء)کوئٹہ کے گنجان آباد علاقے مری آباد کے محلہ عباسیہ، علمدار روڈ پر واقع ٹیوب ویل گزشتہ دس روز سے خراب پڑا ہے، جس کے باعث علاقے میں پینے کے پانی کا شدید بحران پیدا ہو گیا ہے۔ ٹیوب ویل کی خرابی کے سبب خواتین، بچے اور بزرگ پانی کی تلاش میں دور دراز علاقوں میں جانے پر مجبور ہو چکے ہیں جبکہ اکثر گھروں میں کئی دنوں سے پینے کا پانی ناپید ہے۔

علاقہ مکینوں نے واسا حکام سے بارہا شکایات کیں، مگر تاحال کوئی شنوائی نہیں ہوئی۔ مکینوں کا کہنا ہے کہ ایک جانب گرمی کی شدت میں روز بروز اضافہ ہو رہا ہے، تو دوسری جانب پانی جیسی بنیادی سہولت کی عدم دستیابی نے زندگی اجیرن کر دی ہے۔ انہوں نے الزام عائد کیا کہ نہ صرف واسا، بلکہ منتخب نمائندے، بلدیاتی ادارے اور مذہبی و سیاسی جماعتیں بھی خاموش تماشائی بنی ہوئی ہیں، جنہیں عوامی مسائل سے کوئی سروکار نہیں۔

(جاری ہے)

عوامی حلقوں نے واسا حکام سے فوری نوٹس لینے، ٹیوب ویل کی مرمت اور علاقے میں پانی کی باقاعدہ فراہمی یقینی بنانے کا مطالبہ کیا ہے۔ مکینوں نے واضح کیا کہ اگر آئندہ چند روز میں مسئلہ حل نہ ہوا تو وہ مجبورا سڑکوں پر نکل کر شدید احتجاج پر مجبور ہوں گے، جس کی تمام تر ذمہ داری متعلقہ حکام پر عائد ہوگی۔