پشتونخوا ملی عوامی پارٹی کے زیر اہتمام احتجاجی مظاہرہ اور جلسہ عام

کوئٹہ (اُردو پوائنٹ اخبارتازہ ترین - این این آئی۔ 20 جنوری2021ء) پشتونخوا ملی عوامی پارٹی کے زیر اہتمام کوئٹہ پریس کلب کے سامنے پارٹی ضلع قلعہ سیف اللہ کے سینئر معاون سیکرٹری سعید اکبر خان کاکڑ اور پارٹی کے سینئر رہنما نصیب وطن پال کے اغوا کے خلاف احتجاجی مظاہرہ اور جلسہ عام منعقد ہوا جس سے پارٹی کے صوبائی ڈپٹی سیکریٹری اور ممبر صوبائی اسمبلی نصراللہ خان زیرے ،پشتونخوا میپ کے صوبائی ڈپٹی سیکریٹری سید قادر آغا ایڈووکیٹ، پشتون تحفظ موومنٹ کے رہنماوں ملا بہرام اخند، سید زبیر شاہ، پارٹی کے رحمت اللہ صابر، ندا سنگراور کبیر افغان نے خطاب کیا ۔

اس پہلے پارٹی کے مرکزی سیکریٹریٹ سے احتجاجی مظاہرہ برآمد ہوا۔

(جاری ہے)

مظاہرین نے مختلف بازاروں میں گشت کرتے ہوئے پریس کلب پہنچے مقررین نے خطاب کرتے ہوئے کہا کہ سعید اکبر خان کاکڑ اور پارٹی کے سینئر رہنما نصیب وطن پال کو اغوا برائے تاوان میں ملوث افراد نے اغوا کیا اور ان پر فائرنگ کی اور شدید تشدد کا نشانہ بنایا ،مقررین نے مطالبہ کیا کہ سعید اکبر خان کاکڑ اور نصیب وطن پال میں ملوث عناصر کو گرفتار کر کے قرار واقعی سزا دی جائے، انھوں نے کہا کہ ایک خاص سازش کے تحت پورے صوبے اور بالخصوص جنوبی پشتونخوا میں سماج دشمن عناصر اور اغوا برائے تاوان میں ملوث افراد نے عوام کا جینا حرام کیا ہے اور ان عناصر کو حکومتی اداروں کی مکمل پشت پناہی حاصل ہے یہ سماج دشمن عناصر کو کھلی چھوٹ دی گئی ہے کہ وہ جو بھی حرکت کریں ان کو آزادی حاصل ہے ،انہوں نے کہا کہ قلعہ سیف اللہ میں گزشتہ چند ماہ سے ان عناصر نے بد امنی، بھتہ خوری اور چوری کا بازار گرم رکھا ہے جن کی وجہ سے عوام میں سخت بے چینی اور اضطراب پایا جاتا ہے اور گزشتہ روز آل پارٹیز نے قلعہ سیف اللہ میں میں احتجاجی مظاہرہ کیا جس میں پشتونخوا میپ کی نمائندگی سعید اکبرخان کاکڑ نے کی جس نے اپنی تقریر میں ان عناصر کی صحیح نشاندہی کی جس پر ان سماج دشمن عناصر نے سعید اکبر خان کاکڑ اور نصیب وطن پال کو اغوا کر کے انھیں شدید تشدد کا نشانہ بنایا مقررین نے کہا کہ پشتونخوا میپ کے رہنماوں اور کارکنوں کو اپنے قومی اہداف سے دستبردار نہیں کیا جاسکتا ہے اور نہ ہی ان اوچھے ہتھکنڈوں سے ہم مرعوب ھونگے، مقررین نے کہا کہ اغوا برائے تاوان اور سماج دشمن عناصر کو سٹبلشمنٹ ہمارے قومی رہنماوں کے خلاف استعمال کررہے ہیں آے روز ان عناصر سے قومی رہنماوں بالخصوص پشتونخوا میپ کے چیئرمین محمود خان اچکزئی کے خلاف زہر اگلایا جارہا ہے ۔