Khalida Riyasat

وقار اشرف
ٹی وی کی معروف اداکارہ خالدہ ریاست کو مداحوں سے بچھڑے 28 برس بیت گئے۔ان کے معروف ڈراموں میں لازوال، مانی، دو کنارے، ایک محبت سو افسانے، نامدار، بندش، پڑوسی، کھویا ہوا آدمی، ٹائپسٹ اور ہاف پلیٹ شامل تھے۔ان کا آخری ڈرامہ طویل دورانیے کا خصوصی کھیل ”اب تم جا سکتے ہو“ تھا۔مکالموں کی ادائیگی کے منفرد انداز نے انہیں منفرد بنایا۔ان کے ہر ڈرامے اور کردار کا اپنا ہی علیحدہ معیار ہوتا تھا، اداکاری میں کردار کو اپنے اوپر حاوی کر کے سامنے لے آنا کوئی مذاق نہیں۔
یکم جنوری 1953ء کو کراچی میں آنکھ کھولنے والی خالدہ ریاست نے فنی سفر کا آغاز لاہور سے کیا اور پاکستان ٹیلی ویژن کے لاتعداد ڈراموں میں اداکاری کے جوہر دکھائے۔

(جاری ہے)

1970ء کے اواخر میں نشر ہونے والے حسینہ معین کے لکھے اور محسن علی کے پیش کردہ کھیل ”بندش“ سے انہیں پہچان ملی۔70ء اور 80ء کی دہائی کے اوائل کا زمانہ ان کی فنی زندگی کا بہترین دور تھا۔انہوں نے نہ صرف سنجیدہ کردار ادا کیے بلکہ مزاحیہ اداکاری میں بھی خود کو منوایا۔1976ء میں پی ٹی وی کی رنگین نشریات شروع ہوئیں تو وہ پاکستان ٹیلی ویژن لاہور مرکز سے پہلا رنگین ڈرامہ ”پھول والوں کی سیر“ میں آصف رضا میر کے مقابل جلوہ گر ہوئیں۔اس ڈرامے کو اشفاق احمد نے لکھا اور محمد نثار حسین نے پیش کیا تھا۔اس دور میں خالدہ ریاست کو روحی بانو اور عظمیٰ گیلانی کی صف میں شمار کیا جاتا تھا۔ڈرامہ سیریل ”پڑوسی“ میں انہوں نے مزاحیہ کردار کیا تھا جو ٹیلی ویژن پر خالدہ ریاست کا آخری کام ثابت ہوا۔وہ ہر کردار میں بخوبی ڈھل جاتی تھی اور یہ چیز خالدہ ریاست کے علاوہ اور کہیں کم کم ہی نہیں نظر آئی۔ڈرامہ سیریل ”پڑوسی“ میں ان کا کردار جیسا کہانی میں تھا اصل میں بھی خالدہ ریاست ویسی ہی تھی۔90ء کی دہائی میں بننے والے طویل دورانیے کے کھیل ”ہاف پلیٹ“ میں انہوں نے معین اختر کے ساتھ اداکاری کر کے ثابت کیا کہ وہ ہر کردار کو نبھانا بخوبی جانتی ہیں۔وہ روحی بانو کے ساتھ 70ء اور 80ء کی دہائی میں سرِفہرست اداکاراؤں میں شامل تھیں۔وہ 26 اگست 1996ء کو کینسر سے لڑتے لڑتے جان کی بازی ہار گئیں مگر ان کی ٹیلی ویژن کے لئے خدمات آج بھی انہیں مداحوں کے دلوں میں زندہ رکھے ہوئے ہیں۔وہ کراچی میں سخی حسن کے قبرستان میں سپرد خاک ہیں۔