گیرو ڈی اٹالیہ سائیکل ریس ، سلووینیا کے سائیکل سوارتڈیج پوگاچر نے پندرہواں مرحلہ جیت لیا

روم (اُردو پوائنٹ اخبارتازہ ترین - اے پی پی۔ 20 مئی2024ء) سلووینیا کے سائیکل سوارتڈیج پوگاچر نے گیرو ڈی اٹالیہ سائیکل ریس کا پندرہواں مرحلہ جیت لیا۔ اٹلی میں گیرو ڈی اٹالیہ کا 107 واں ایڈیشن جاری ہے جس میں سائیکلنگ کی دنیا کے نامور سائیکل سوار ٹائٹل کے حصول کے لئے کوشاں ہیں۔ گیرو ڈی اٹالیہ سائیکل ریس کے پندرہویں مرحلے میں سائیکل سواروں نے مانربا ڈیل گارڈا سے لیوگنو تک کا فیصلہ طے کرنا تھا ،یہ مرحلہ پہاڑی راستے پر تھا جس کا فاصلہ 222کلو میٹر پر محیط تھا۔

25 سالہ سلووینیا کے سائیکل سوارتڈیج پوگاچر نے عمدہ سائیکلنگ کا مظاہرہ کرتے ہوئے 222کلومیٹر کا فاصلہ 6گھنٹے ،11منٹ اور 43 سیکنڈز میں طے کرکے 15ویں مرحلے میں پہلی پوزیشن حاصل کی۔34 سالہ کولمبیا کے سائیکل سوار نائیرو کوئنٹانا نے دوسری جبکہ 22 سالہ جرمن سائیکلسٹ جارج سٹین ہاوزر نے تیسری پوزیشن حاصل کی۔

(جاری ہے)

ریس میں سلووینیا کے سائیکل سوارتڈیج پوگاچر کا پنک جرسی پر قبضہ برقرار ہے ۔

گزشتہ سال گیرو ڈی اٹالیہ سائیکل ریس ٹیم جمبو ویزما کے سلووینین سائیکل سوار پریموز روگلک نے جیتی تھی، وہ رواں ایڈیشن میں شامل نہیں ہیں تاہم رواں سال تڈیج پوگاچر سلووینیا کی نمائندگی کر رہے ہیں۔ گیرو ڈی اٹالیہ ایک گرینڈ ٹور سائیکلنگ سٹیج ریس ہے جو تین ہفتوں میں مکمل ہوگی جس میں دنیا کے نامور سائیکلسٹ شریک ہیں۔ گیرو ڈی اٹالیہ سائیکل ریس 21 مرحلوں پر محیط ہے جس میں سائیکل سوار 3400.8 کلو میٹر کا سفر طے کریں گے۔ گیرو ڈی اٹالیہ سائیکل ریس میں 22 ٹیمیں ٹائٹل کے حصول کے لئے کوشاں ہیں۔ گیرو ڈی اٹالیہ سائیکل ریس 23 روز جاری رہنے کے بعد 26 مئی کو اختتام پذیر ہوگی۔\932