بنگلہ دیش کے خلاف آسٹریلوی ٹیم کی قیادت تہلیا میک گرا کریں گی، مولینیو اور ہیملٹن باہر

سڈنی(اُردو پوائنٹ اخبارتازہ ترین - این این آئی۔ 30 ستمبر2026ء) آسٹریلیا کی خواتین کرکٹ ٹیم کی کپتان صوفی مولینیو اور لوسی ہیملٹن انجریز کے باعث بنگلہ دیش کے خلاف 3 ایک روزہ بین الاقوامی میچز کی سیریز سے باہر ہوگئی ہیں تاہم دونوں کے نیوزی لینڈ کے خلاف ٹی ٹونٹی سیریز تک فٹ ہونے کی امید ہے۔غیر ملکی میڈیا کے مطابق آسٹریلیا نے دونوں سیریز کے لئے 14 رکنی مشترکہ سکواڈ کا اعلان کیا ہے،بنگلہ دیش کے خلاف ایک روزہ سیریز 9 سے 14 اکتوبر تک برسبین میں کھیلی جائے گی، جس میں تہلیا میک گرا ٹیم کی قیادت کریں گی۔

اگر صوفی مولینیو نیوزی لینڈ کے خلاف 18 سے 22 اکتوبر تک سڈنی میں ہونے والی ٹی ٹونٹی سیریز کے لیے مکمل فٹ نہ ہوئیں تو نائب کپتان ایشلی گارڈنر قیادت سنبھالیں گی۔صوفی مولینیو کولہے کی انجری کے باعث ایک روزہ سیریز سے باہر ہوئی ہیں۔

(جاری ہے)

قومی سلیکٹر شان فلیگلر کے مطابق انجری میں بہتری آ رہی ہے تاہم وہ بنگلہ دیش کے خلاف میچز کے لیے مکمل فٹ نہیں ہیں۔

لوسی ہیملٹن کو ٹریننگ کے دوران ران کے پٹھے میں معمولی کھنچا کا سامنا کرنا پڑا، تاہم ان کے نیوزی لینڈ کے خلاف ٹی ٹونٹی سیریز تک فٹ ہونے کی توقع ہے۔ فاسٹ بالر ڈارسی بران کمر کی انجری کے باعث دونوں سیریز سے باہر ہیں۔ ان کی انجری کے باعث 10 ہفتوں تک کرکٹ سے دور رہنے کا خدشہ ہے، تاہم آسٹریلیا کو امید ہے کہ وہ بگ بیش لیگ کے کچھ میچز کے لیے دستیاب ہوسکتی ہیں۔

بنگلہ دیش کے خلاف سیریز کے لیے آسٹریلیا کے پاس فی الحال 12 کھلاڑی دستیاب ہیں۔ سلیکٹرز ویمنز نیشنل کرکٹ لیگ کے آئندہ میچز کے بعد ایک اضافی کھلاڑی سکواڈ میں شامل کرنے پر غور کر رہے ہیں۔ دوسری جانب ٹی ٹونٹی ورلڈ کپ کی فاتح ٹیم کا حصہ رہنے والی گریس ہیرس کو دونوں سیریز کے لیے سکواڈ میں شامل نہیں کیا گیا۔ سلیکٹر شان فلیگلر نے کہا کہ محدود سکواڈ اور ورلڈ کپ کے دوران کم مواقع کے باعث گریس ہیرس کا انتخاب نہ ہونا بدقسمتی ہے، تاہم وہ مستقبل کے لیے ٹیم کی منصوبہ بندی میں شامل ہیں۔

آسٹریلیا کے سکواڈ میں نکولا کیری، ایشلی گارڈنر، کم گارتھ، لوسی ہیملٹن، الانا کنگ، فوبی لِچ فیلڈ، تہلیا میک گرا، صوفی مولینیو، بیتھ مونی، ایلیس پیری، میگن شٹ، اینابیل سدرلینڈ، جارجیا وول اور جارجیا ویرہم شامل ہیں۔