زمبابوے کرکٹ کے چیئرمین ولسن مناس نے آئی سی سی سے پاکستان کے حوالے سے اپنی پالیسی بدلنے کا مطالبہ کر دیا

ہرارے (اُردو پوائنٹ اخبار تازہ ترین۔ 26 مئی۔2015ء) زمبابوے کرکٹ کے چیئرمین ولسن مناس نے انٹر نیشنل کر کٹ کونسل سے پاکستان کے حوالے سے اپنی پالیسی بدلنے کا مطالبہ کر تے ہو ئے کہا ہے کہ پاکستان انٹرنیشل کر کٹ کیلئے محفوظ ملک ہے آئی سی سی اس حوالے سے اپنی پوزیشن پر نظر ثانی کر ے،ٹیسٹ کھیلنے والے ممالک پاکستان میں جا کر کر کٹ کھیلیں ،پاکستانی عوام کی طرف سے شاندار استقبال پر انکے شکر گزار ہیں ۔

غیر ملکی ویب سائٹ کو انٹرویو میں انھوں نے کہا کہ وہ لوگ جو پاکستان کی سیکیورٹی کے حوالے سے خوفزدہ ہیں انھیں ہماری ٹیم کے جاری ٹور کے دوران یہاں آنا چاہیے۔ ولسن نے کہا کہ زمبابوین اسپورٹس اینڈ ریکریشن کمیٹی نے وزارت خارجہ سے مشاورت کی اور وہاں پر کسی نے کہا کہ پاکستان کا دورہ خطرناک ثابت ہوسکتا ہے، خاص طور پر جو کچھ کراچی میں ہوا اس سے خدشات بڑھے، میں نے کمیٹی کے آفیشلز سے ملاقات کرنا چاہی مگر وہاں سے جواب آیا کہ وہ مصروف ہیں، ہمارے پاس بھی وقت نہیں تھا، ٹیم کی روانگی سے قبل صرف دو دن باقی تھے۔

(جاری ہے)

میں نے حکومت میں متعلقہ اتھارٹیز سے بات کی اورانھوں نے دورے کی اجازت دے دی۔ ولسن نے مزید کہا کہ میں دنیا خاص طور پر ٹیسٹ کھیلنے والے ممالک کو بتانا چاہتا ہوں کہ پاکستان ایک محفوظ ملک ہے، ہمیں آئی سی سی کے ممبران سے درخواست کرنی چاہیے کہ وہ اس کے حوالے سے اپنی پوزیشن پر نظر ثانی کریں، وہ جب یہاں آئیں گے تب ہی علم ہوگا کہ کرکٹ کے محفوظ انعقاد کیلئیکیسے انتظامات کیے گئے ہیں، ہمارایہاں عوام کی جانب سے بھی گرمجوش استقبال ہوا، ہم خود کوانتہائی محفوظ محسوس کررہے ہیں۔