لاہور، لیجنڈری فاسٹ باؤلر فضل محمود کی 10ویں برسی 30مئی کو منائی گئی

لاہور(اُردو پوائنٹ اخبار تازہ ترین۔ 30 مئی۔2015ء) کرکٹ کی دنیا میں پاکستان کی شناخت کرانے والے اوول کے ہیرو فضل محمود کو دنیا سے رخصت ہوئے 10برس بیت گئے ہیں۔ لیجنڈری فاسٹ باولر فضل محمود 18فروری 1928کو لاہور میں پیدا ہوئے۔ پاکستان کے معرض وجود میں آنے کے بعد ارض وطن کو جب ٹیسٹ کرکٹ کا درجہ ملا، تو اپنے پہلے ہی دورہ بھارت کے دوران لکھنو ٹیسٹ میں انہوں نے شاندار باولنگ کی اور 12وکٹیں لے کر پاکستان کو پہلی فتح دلوانے میں اہم کردار ادا کیا۔

(جاری ہے)

1954میں انگلینڈ کے دورے کے دوران اوول ٹیسٹ میں گوروں کو اپنی گیندوں پر تگنی کا ناچ نچا کر 12کھلاڑیوں کو پویلین کی راہ دکھائی اور کامیابی سمیٹ کر دنیا بھر میں پاکستان کی شناخت کا سبب بنے۔ 1956میں کراچی میں آسٹریلیا کے خلاف 13، جبکہ 1959میں ڈھاکہ میں ویسٹ انڈیز کے خلاف 12وکٹیں حاصل کیں۔ یوں 10سالہ کیریئر کے دوران انہوں نے 34ٹیسٹ کھیل کر 139وکٹیں لیں اور 620رنز بنائے۔ وہ کرکٹ کو خیر باد کہنے کے بعد پنجاب پولیس سے منسلک ہوئے اور ڈی آئی جی کے عہدے تک پہنچے۔ مرحوم نے کتابیں بھی تحریر کیں، زندگی کے آخری ایام میں وہ گوشہ نشینی اختیار کر گئے تھے اور 30مئی 2005کو 78برس کی عمر میں خالق حقیقی سے جا ملے۔ پاکستان کرکٹ کے لئے ان کی خدمات کو کبھی فراموش نہیں کیا جا سکے گا۔‘