عورت برائے فروخت

زمانہ جاہلیت کا ذکر ہے جب عورتوں کی منڈیاں لگائی جاتی تھیں۔عورت کو کسی گائے بکری کی طرح ناپ تول کر ٹٹول کر خریدا اور فروخت کیا جاتا تھا۔ سرِعام بولیاں لگائی جاتی تھیں۔ عورت کو بس ایک عام سی چیز کی سی اہمیت حاصل تھی، استعمال کیا اور پھینک دیا۔
مؤرخین یہ کہتے ہیں کہ ہندؤوں میں ایک مذہبی فرقہ ایسا بھی تھا کہ جس میں برہنہ عورتوں کی پوچا کی جاتی تھی، صرف اور صرف نفسانی خواہشات کو پورا کرنے کے لئے ۔

برہمن کے دور میں بیوی عورت ہونے کی صورت میں خاوند کے بھائیوں کی لونڈی بن جاتی تھی۔
لڑکی باپ کی وارث نہیں بن سکتی ،نرینہ اولاد نہ ہونے کی صورت میں بیٹی وارث نہیں بلکہ متبنیٰ (منہ بولا) بیٹا جو غیر کا ہوتا تھا وہ وارث ہوتا تھا، الغرض یہ تہذیب و تمدن کے سارے ادوار جن کا تعلق قبل از اسلام سے ہے۔

(جاری ہے)

قبل از اسلام عورت کی محکومیت کے دو نام تھے۔

مال غنیمت میں حاصل ہونے والی عورتوں سے نفع مند ہونے کے علاوہ دوسرا طریقہ عورتوں کو فروخت کرنے کا تھا۔ فروخت کر کے اس کی یوں تذلیل کی جاتی تھی اس کی فروخت مکہ اور ایران کے درمیان باز نطینہ کے مقام پر ہوتی تھی۔
غرض کہ عورت پوری ذلّت و رسوائی کی تصویر بنی ہوئی تھی۔وہ معاشرہ جس میں بھائی بہن سے شادی کرتا ہو، باپ بیٹی کو اپنی زوجیت میں لیتا ہو، بیٹا اپنے باپ کی منکوحہ کے ساتھ رشتہ ازدواج منسلک کرتا ہو، اس معاشرے کو انسانی معاشرہ کہنا عقلاًممکن نہیں ہے۔

تو آج کے مستشرقین بھلا یہ کہہ سکتے ہیں کہ اسلام نے عورت کو اس کے جائز حقوق سے محروم کر کے قید کرنے کوشش کی ہے۔ حالانکہ اسلام نے تو عورت کو حقیقی آزادی ، خودمختاری سے جینے کا حق ، اور معاشرے میں بلند مقام دیا ہے۔
پھر اسلام کا سورج چمکا اور عورت کو بازاروں کی رونق سے گھر کی عزت بنا دیا گیا۔وہ مرد جو کبھی عورت کو پاؤں کی جوتی سمجھا کرتا تھا عورت کے پاؤں میں اپنی جنت تلاش کرنے لگا، اور اسی عورت کے پاؤں کو چومنے لگا۔

عورت کو اسلامی معاشرے نے وہ مقام دیا جس مقام کا تصور تک قبل از اسلام موجود نہ تھا۔
مگر افسوس کہ وہی عورت کہ جس کو اسلام نے زمین کی پستیوں سے اٹھا کر آسمان کی بلندیوں پر بٹھا دیا تھا، آج پھر سے زمانہءجدید کی انہی تاریکیوں کی جانب محوِسفر ہے کہ جن سے اسلام کی روشنی نے انہیں نکالا تھا۔ کل عورت جہالت کے نام پر بِک رہی تھی اور آج جِدّت کے نام پر بِک رہی ہے ۔ آج کی عورت جِس راہ پہ چل رہی ہے اس راہ کا اختتام تباہی و بربادی و رسوائی ہے ۔