محکمہ موسمیات کی اگلے چوبیس گھنٹوں کے دوران راولپنڈی ، اسلام آباد اور لاہور میں بارش کی پیشن گوئی

اسلام آباد/ لاہور/ راولپنڈی (اُردو پوائنٹ اخبار تازہ ترین۔23جولائی۔2014ء) محکمہ موسمیات نے اگلے چوبیس گھنٹوں کے دوران راولپنڈی ، اسلام آباد اور لاہور میں بارش کی پیشن گوئی کرتے ہوئے کہا ہے کہ ملک کے دیگر علاقوں میں موسم خشک اور گرم رہے گا۔محکمہ موسمیات کے مطابق راولپنڈی ، اسلام آباد ، گوجرانوالہ ، ، سرگودھا اور مالاکنڈ ڈویژن میں بھی رم جھم کی پیش گوئی کی گئی ہے۔

وسطی بھارت سے ہوا کا کم دباوٴ جنوبی سندھ میں داخل ہوگا جس کے بعد رات میرپور خاص میں موسلا دھار بارش ہوگی ۔ بارشوں کا سلسلہ دو روز تک جاری رہنے کا امکان ہے ۔ کراچی سمیت سندھ کے ساحلی علاقوں میں بوندا باندی بھی ہوگی ، ملک کے دیگر علاقوں میں موسم خشک اور گرم رہے گا۔ ادھر کراچی کے مختلف علاقوں میں ہلکی رم جھم پھنوار برسنے کے بعد موسم کی سختی ماند پڑ گئی۔

(جاری ہے)

علی الصبح مختلف علاقوں صدر، کلفٹن، ڈیفنس، قیوم آباد، شاہراہ فیصل، کالا پل اور ملحقہ علاقوں میں ہلکی بارش ہوئی جس کے بعد موسم نے پلٹی کھائی اور یک دم تبدیل ہوگیا، بارش کے بعد سڑکوں پر پانی تو جمع نہ ہوا البتہ سڑکوں پر پھسلن کے باعث کئی حادثات پیش آئے، اکثر حادثات موٹرسائیکل سواروں کے ساتھ پیش آئے جو بریک لگاتے ہوئے اچانک پھسل گئے ‘ بارش کے بعد خاکروب بھی سڑکوں پر نکل آئے اور نالیوں کے گرد جمع کچرا صاف کرکے انہیں کلیئر کردیا۔