پنگریو اور گرد ونواح میں، گرج چمک اور تیز ہوا کے ساتھ بارش ، گرمی کے ستائے عوام گھروں سے باہر نکل آئے اور باران رحمت کا لطف اٹھایا

پنگریو (اُردو پوائنٹ اخبار تازہ ترین۔یکم ستمبر۔2014ء) پنگریو اور گرد ونواح کے علاقوں میں گزشتہ تین روز سے جاری گرمی کی شدیدلہر کے بعد گرج چمک اور تیز ہوا کے ساتھ بارش ہو ئی جو کہ وقفے وقفے سے کئی منٹ تک جاری رہی بارش شروع ہوتے ہی گرمی کے ستائے عوام گھروں سے باہر نکل آئے اور باران رحمت کا لطف اٹھایا بارش کے باعث گرمی کی شدت میں عارضی طور پر کمی ہو گئی اور موسم خوشگوار ہو گیا بارش کے باعث پنگریو شہر کے نشیبی علاقوں میں پانی جمع ہو گیا بارش کے ساتھ چلنے والی تیز ہوا کے باعث گاؤں پچیس واٹر میں بجلی کے متعدد پول گر گئے تاہم حیسکو پنگریو کا انچارج لائن سپرنٹنڈنٹ محمد ملاح اور حیسکو کا دیگر عملہ ڈیوٹی سے غائب تھا جس کی وجہ سے پورے علاقے میں بجلی کی فراہمی معطل ہو گئی بعد ازاں پرائیویٹ عملے نے کلوئی برانچ کی لائن کاٹ کر پنگریو شہر میں بجلی کی سپلائی بحال کی جبکہ کلوئی برانچ کی بجلی ساری رات معطل رہی جس کی وجہ سے اس برانچ پر واقع تین سو سے زائد دیہاتوں اورقصبوں کے ہزاروں باشندوں کو سخت پریشانی کا سامنا کرنا پڑا کلوئی برانچ پر بجلی کی فراہمی پیر کے روز صبح گیارہ بجے بحال ہوئی بارش کے بعد ایک بار پھر گرمی میں اضافہ ہو گیا اور آسمان پر بادل چھاگئے اور مزید بارش کی توقع تھی