لاہور میں13ملی میٹر بارش ریکارڈ، باقاعدہ مون سون بارشوں کا آغاز ہوگیا

لاہور(اُردو پوائنٹ تازہ ترین اخبار۔9 جولائی- 2016ء) صوبائی دارالحکومت لاہور میں13ملی میٹر بارش ریکارڈ کی گئی ہونے ہفتہ کے روز ہونے والی بارش باقاعدہ مون سون بارشوں کا آغاز ہے۔ محکمہ موسمیات کا کہنا ہے کہ لاہور سمیت پنجاب کے بالائی اور میدانی علاقوں میں آئندہ تین روز تک مون سون بارشوں کا سلسلہ جاری رہے گا۔ آج اورکل گرج چمک کے ساتھ موسلادھار بارش کا امکان ہے جس سے حبس میں مزید کمی ہوگی اور موسم خوشگوار ہوجائے گا۔

ہفتہ کی صبح تقریباً چار بجے ہونے والی بارش وقفہ وقفہ سے جاری رہی جس سے شہریوں کے چہرے کھل اٹھے اور جمعہ کے روز ہونے والی شدید گرمی سے بوکھلاتے چہروں نے سکھ کا سانس لیا بارش کے باعث شہر کے نشیبی علاقوں سمیت کھیلوں کے میدانوں میں پانی بھر آیا جس کی وجہ سے نہ صرف کھیلوں کی سرگرمیاں متاثر ہوئیں بلکہ شہریوں کے لئے گھروں سے نکلنا محال ہوگیا۔

(جاری ہے)

بارش کا فائدہ اٹھاتے ہوئے سبزی فروش شہریوں سے منہ مانگی قیمتیں وصول کرتے رہے جبکہ رکشہ ڈرائیوروں نے بھی بارش میں مسافروں سے من مانے کرائے وصول کیے بارش کی وجہ سے شہر کے مختلف علاقوں میں بجلی کی سپلائی منقطع ہوگئی جو دوپہر دو بجے تک بحال نہ ہوسکی جس کی وجہ سے صارفین کو شدید پریشانی کا سامنا کرنا پڑا ان علاقوں میں اقبال ٹاؤن نرگس بلاک گڑھی شاہو، سمن آباد مزنگ سمیت دیگر علاقے شامل ہیں بارش کے فوری بعد واسا کا عملہ حرکت میں آگیا اور اس نے نشیبی علاقوں سے نکاسی آب کا کام شروع کردیا جس کے نتیجہ میں بارش ختم ہونے کے چند گھنٹوں بعد نکاسی آب کا کام مکمل کرلیا گیا۔