پنجاب کے میدانی علاقوں میں بدستور دھند کا راج، نظام زندگی مفلوج

لاہور(اُردو پوائنٹ اخبارتازہ ترین - آئی این پی۔ 14 دسمبر2016ء) پنجاب بھر کے میدانی علاقوں میں بدستور دھند کا راج رہا جس کے باعث شہریوں کو شدید مشکلات کا سامنا رہا۔پنجاب بھر میں دھند کا راج جاری رہا۔ نیشنل ہائی وے پر پتوکی سے اوکا ڑہ تک کے علا قوں میں ٹکریوں کی صورت میں دھند سے حد نگاہ اکثرمقامات پرصفرہوگئی جب کہ لاہورمیں موٹروے بند رہی ۔

لاہورمیں مو ٹروے ایم 3 فیصل آباد سے پنڈ ی بھٹیا ں تک، مو ٹروے ایم 4 گوجرہ سے فیصل آباد جب کہ موٹروے ایم 2 لاہورسے شدید دھند کی وجہ سے بند رہی جب کہ کئی مقامات پرحد نگاہ صفر رہی ۔ موٹروے حکام کی جانب سے شہریوں کو دھند کے دوران غیر ضروری سفر سے گریز کرنے کی ہدایت کی گئی ۔کوٹ مومن میں بھی شدید دھند کے باعث موٹروے کے دونوں انٹرچینج بند کردئیے گئے، انٹرچینج بند ہونے کے باعث گاڑیوں کی لمبی قطاریں لگ گئیں جب کہ شہراورگردونواح میں گہری حد نگاہ صفر ہوگئی۔

(جاری ہے)

دوسری جانب 7 روزبعد لاہورسمیت دیگرمضافاتی علاقوں میں مطلع جزوی طور پر صاف ہوگیا جہاں سورج نے شہریوں کو اپنا چہرا جزوی طورپردکھا دیا۔پولیس کے مطابق قصور کے علاقے کوٹ رادھاکشن میں ڈاکوؤں نے 5 رکنی گروہ گرفتار کیا، ڈاکودھند میں گاڑیاں روک کرلوٹ رہے تھے جب کہ ڈاکوؤں سے لاکھوں روپے کا مال بھی برآمد کیا گیا ۔