سیکیورٹی صورتحال میں نمایاں بہتری ،کاروبار اور سرمایہ کار دوست حکومتی پالیسیوں سے تجارت ،سرمایہ کاری کے مواقع بڑھے ہیں، ہارون اختر خان

کورین سرمایہ کاروں کو پاکستان میں سرمایہ کاری کے مواقعوں سے استفادہ حاصل کرنا چاہئے، معاون خصوصی وزیراعظم کی کورین سفیر سے گفتگو

پیر اپریل 21:54

اسلام آباد (اُردو پوائنٹ اخبارتازہ ترین۔ 16 اپریل2018ء) وزیراعظم کے معاون خصوصی برائے ریونیو و وفاقی وزیر سینیٹر ہارون اختر خان نے کہا ہے کہ ملک میں سیکیورٹی صورتحال میں نمایاں بہتری ،،کاروبار اور سرمایہ کاری دوست حکومتی پالیسیوں کے نتیجہ میں تجارت اور سرمایہ کاری کے مواقع بڑھے ہیں، کورین سرمایہ کاروں کو ان سے بھرپور استفادہ کرنا چاہئے۔

معاون خصوصی وزیراعظم سینیٹر ہارو ن اختر نے یہ بات پیر کو پاکستان میں جنوبی کوریا کے سفیر کواک سنگ کیو سے ایف بی آر ہائوس میں ملاقا ت کے دوران گفتگو کرتے ہوئے کہی ۔ انہوں نے کہا کہ ملک میں سیکیورٹی صورتحال میں بہتری ، کاروبار اور سرمایہ کاردوست حکومتی پالیسیوں کے باعث تجارت اور سرمایہ کاری کے مواقع میں اضافہ ہوا ہے ۔

(جاری ہے)

انہوں نے کہا کہ پاکستان کی مارکیٹ سازگار معاشی و سرمایہ کاری پالیسیوں کی بدولت اچھے منافع کے مواقع فراہم کرتی ہے۔

انہوں نے کہا کہ کورین تاجر اور سرمایہ کار ان سے فائدہ اٹھائیں اور اقتصادی نمو میں حصہ لیں۔ کورین سفیر کواک سنگ کیو نے اس موقع پر گفتگو کرتے ہوئے کہا کہ پاکستان کی معیشت تیزی سے نمو پا رہی ہے جہاں تجارت اور سرمایہ کاری کی بڑی گنجائش موجود ہے۔ انہوں نے پاکستان میں سیکیورٹی کی بہتر صورتحال اور سرمایہ کاری دوست ماحول پر اطمینان کا اظہار کیا۔ انہوں نے وفاقی وزیر کو کورین تاجروں کی جانب سے پاکستان میں شروع کئے گئے اور مستقبل کے کاروباری منصوبوں کے بارے میں آگاہ کیا۔