ْ بھارتی حکومت نے اپنی فورسز کو نہتے کشمیریوں پر مظالم کی کھلی چھٹی دے رکھی ہے، حریت فورم

بدھ 18 اپریل 2018 17:32

سرینگر ۔ (اُردو پوائنٹ اخبارتازہ ترین - اے پی پی۔ 18 اپریل2018ء) مقبوضہ کشمیر میں میر واعظ عمر فاروق کی سربراہی میں قائم حریت فورم نے بھارتی فورسز کی طرف سے سرینگر،اسلام آباد، ترال، پلوامہ، سوپور، بارہمولہ ، گاندربل اور دیگر مقامات پر طلبہ کے خلاف طاقت کے وحشیانہ استعمال کی شدید مذمت کرتے ہوئے کہا ہے کہ بھارتی حکومت نے اپنی فورسز کو نہتے کشمیریوں پر مظالم کی کھلی چھٹی دے رکھی ہے۔

کشمیر میڈیاسروس کے مطابق فورم کے ترجمان نے سرینگر میں جاری ایک بیان میں کہا کہ قابض فورسز نے بدھ کے روز اسلام آباد میں طلبہ کے ایک امن مظاہرے پر دھاوا بول کر کئی طالبات سمیت بیسیوں طلباء زخمی کر دیے۔ انہوںنے کہا کہ طلبہ کے خلاف آنسو گیس اور پاوا شیلنگ کا بے تحاشا استعمال کیا گیا جوکھلی ریاستی دہشت گردی ہے۔

(جاری ہے)

انہوںنے کہا کہ کشمیری طلبہ آبرو ریزی اور قتل کا نشانہ بننے والی کم عمر آصفہ کے اہلخانہ کو انصاف دلانے کے لیے پر امن مظاہرے کر رہے ہیں جس پر قابض فورسز انکے خلاف طاقت کا بے تحاشا استعمال کر رہی ہیںجو انتہائی قابل مذمت ہے ۔

ترجمان نے کہا کہ جبر واستبدا کے ہتھکنڈوں سے کشمیریوں کی آواز کو کسی صورت دبایا نہیں جاسکتا۔ترجمان نے شہید ایس حمید وانی کو شہادت کی 20ویں برسی پر شاندار خراج عقیدت پیش کیا۔دریں اثنا حریت رہنما مختار احمد وازہ نے اسلام آباد کے ہسپتال جاکر زخمی طالبات کی عیادت کی اور بھارتی دہشت گردی کی بھر پور مذمت کی۔