بھارتی افواج کشمیری عوام کے جذبہ آزادی کو ختم کرنے میں بری طر ح ناکام ہے ‘لندن میں احتجاجی مظاہرہ کا بنیادی مقصد مقبوضہ کشمیر میں انسانیت سوز کارروائیوں کو عالمی برادری کے سامنے اجاگر کرنا ہے

آزادکشمیر حکومت کے وزیر بحالیات و ٹرانسپورٹ ناصر حسین ڈار کی بات چیت

جمعرات 19 اپریل 2018 17:56

مظفرآباد (اُردو پوائنٹ اخبارتازہ ترین - آئی این پی۔ 19 اپریل2018ء) آزادکشمیر حکومت کے وزیر بحالیات و ٹرانسپورٹ ناصر حسین ڈار نے کہا ہے کہ بھارتی افواج کشمیری عوام کے جذبہ آزادی کو ختم کرنے میں بری طر ح ناکام ہے لندن میں احتجاجی مظاہرہ کا بنیادی مقصد مقبوضہ کشمیر میں انسانیت سوز کارروائیوں کو عالمی برادری کے سامنے اجاگر کرنا ہے انہوں نے مزید کہا ہے کہ مسئلہ کشمیر پر آزا دکشمیر کی تما م سیاسی قیادت متحدو متفق ہے ۔

اور یک زبان ہو کر مقبوضہ کشمیر میں بھارتی اندوہناک مظالم کے خاتمہ کے لئے ملکی او ر عالمی سطح پر آواز بلند کررہی ہے۔انہوں نے مودی کو انسانیت کا قاتل قرار دیتے ہوئے کہا کہ عالمی برادری کو مودی کے جنگی جنون کا فوری نوٹس لینا چاہیے کیونکہ اگر اس کو بروقت نہ روکا گیا تو عالمی امن تہس نہس ہو سکتا ہے ۔

(جاری ہے)

ناصر حسین ڈار وزیر بحالیات آزاد کشمیر نے شہداء کی قربانیوں کو تحریک آزادی کا قیمتی اثاثہ قرار دیا اور کہا کہ مقبوضہ کشمیرمیں بالا آخر آزادی کا سورج طلوع ہو کر رہے گا۔

اخبارنویسوں سے گفتگو کے دوران انہوں نے مزید کہا کہ آزا دکشمیر میں مسلم لیگ ن کی موجودہ حکومت وزیر اعظم راجہ محمد فاروق حیدر خان کی زیر قیادت آزاد خطہ میں مثالی اور مربوط منصوبہ بندی اور پائیدار اور بلا تخصیص تعمیر وترقی کی خواہاں ہے اور ترقیاتی منصوبوں کی معیاری اور بروقت تکمیل کو یقینی بنانے کے لیے موثر اقدامات کیے گئے ہیں اور یہی وجہ ہے کہ آزاد کشمیر میں رواں مالی سال میں ترقیاتی بجٹ کی 84فیصد سے زائد رقم خرچ کی جاچکی ہے اور آئیندہ بھی فنانشل ڈسپلن کو یقینی بنایا جائے گا۔