مقبوضہ کشمیر‘ بھارتی فوج کا مظاہرین کے خلاف طاقت کا وحشیانہ استعمال، متعدد زخمی

جمعرات 19 اپریل 2018 18:12

سرینگر۔ (اُردو پوائنٹ اخبارتازہ ترین - اے پی پی۔ 19 اپریل2018ء) مقبوضہ کشمیر میں کٹھوعہ کی آٹھ سالہ آصفہ بانو کی آبرو ریزی اور قتل کے المناک واقعے کے خلاف سرینگر اور دیگر تمام بڑے قصبوں میں زبردست احتجاجی مظاہرے جاری رہے۔ بھارتی فوجیوں اور پولیس اہلکاروں کی طرف سے مظاہرین پر طاقت کے وحشیانہ استعمال کے نتیجے میں طلبہ سمیت بیسیوں افراد زخمی ہو گئے۔

کشمیر میڈیا سروس کے مطابق سرینگر، بڈگام، ناگام، چاڈورہ، گاندربل، کنگن، شوپیاں، پلوامہ، اسلام آباد، بارہمولہ، سوپور، بونیار، رفیع آباد،ڈلنہ، کپواڑہ، بانڈی پورہ، اجس اور دیگر علاقوں میں سکولوں اور کالجو ں کے طلباء سمیت بڑی تعداد میں لوگ سڑکوں پر نکل آئے اور کم سن بچی کے مجرموں کو کڑی سزا دینے کا مطالبہ کیا۔

(جاری ہے)

مظاہرین نے آزادی کے حق میں اور بھارت کے خلاف فلک شگاف نعرے لگائے اور پاکستانی جھنڈے لہرائے ۔

بھارتی فورسز کے اہلکاروں نے مختلف علاقوں میں مظاہرین کو منتشر کرنے کیلئے پیلٹ چلائے اور آنسو گیس کے گولے داغے جس کے بعد فورسز اہلکاروں اور مظاہرین کے درمیان جھڑپیں شروع ہو گئیں ۔ قابض فورسزکی طر ف سے طاقت کے وحشیانہ استعمال سے طلبہ سمیت بیسیوں افراد زخمی ہو گئے۔ شدید زخمیوں کو سرینگر کے ہسپتالوں میں داخل کیا گیا۔ ننھی بچی کی آبرو ریزی اور قتل کے بہیمانہ واقعے کے خلاف کپواڑہ میں خصوصی افراد کی ایک بڑی تعداد نے احتجاجی ریلی نکالی۔

انہوں نے مجرموں کو سزائے موت دینے کا مطالبہ کیا۔ بھارتی فورسز کی طرف سے گزشتہ روز طلبہ پر طاقت کے وحشیانہ استعما ل کیخلاف ترال قصبے میںمکمل ہڑتال کی گئی۔ دکانیں اور کاروباری مراز بند رہے جبکہ سڑکوں پر ٹریفک کی آمد ورفت معطل تھی۔ حریت رہنمائوں محمد اشرف صحرائی ، محمد یاسین ملک ،آسیہ اندرابی ، بلال صدیقی ، شبیراحمد ڈار اور کشمیر ہائی کورٹ بار ایسوسی ایشن نے اپنے بیانات میں بھارتی فوجیوں اور پولیس اہلکاروں کی طرف سے گزشتہ روزطلباء پر طاقت کے وحشیانہ استعمال کی شدید مذمت کی ہے ۔ محمد اشرف صحرائی نے مقبوضہ علاقے کی موجودہ صورتحال کو انتہائی مخدوش اور ابتر قراردیا۔