عوامی نیشنل پارٹی کا 7مئی کو جشن پختونخوا منانے کا اعلان

مرکزی تقریب میں اسفندیار ولی خان خصوصی شرکت کریں گے تمام اضلاع،فاٹا اور ایف آرز میں بھی تقریبات منعقد کی جائیں گی

پیر 30 اپریل 2018 21:18

پشاور(اُردو پوائنٹ اخبارتازہ ترین - این این آئی۔ 30 اپریل2018ء) عوامی نیشنل پارٹی کے زیر اہتمام جشن پختونخوا کے حوالے سے ایک عظیم الشان مرکزی تقریب کا انعقاد 7مئی بروزپیر باچا خان مرکز میں کیا جا رہا ہے جس سے پارٹی کے مرکزی صدر اسفندیار ولی خان سمیت پارٹی کے مرکزی و صوبائی قائدین خطاب کریں گے ، اسی طرح تمام اضلاع بشمول فاٹا اور ایف آرز میں بھی جشن پختونخوا کے حوالے سے خصوصی تقریبات منعقد کی جائیں گی ، ان تقریبات میں شعراء اپنے کلام اور محققین و دانشور اپنے مقالوں کے ذریعے اس عظیم کامیابی پر اپنے خیالات کا اظہار کریں گے، صوبائی صدر امیر حیدر خان ہوتی نے پارٹی کے تمام عہدیداروں ، کارکنوں اور تمام ذیلی تنظیموں کو ہدایات جاری کی ہیں کہ وہ ان تقریبات میں خصوصی طور پر شرکت یقینی بنائیں اور اے این پی کے گزشتہ دور حکومت میں حاصل کی گئی تمام کامیابیوں سے عوام کو آگاہ کرنے کیلئے منظم اور مآثر انداز میں اپنی توانائیاں بروئے کار لائیں ۔